Чен чүәнго уйғур елидики юқири бесимлиқ сиясәтләрни изчил давамлаштурушни тәләп қилди

Мухбиримиз ирадә
2020-11-26
Share

Уйғур аптоном районлуқ парткомниң секритари чен чүәнгониң уйғур елида "сотсиялистик шинҗаңниң йеңи дәврини бәрпа қилиш" ни тәкитлиши диққәт қозғиди.

"тәңритағ" ториниң хәвиригә қариғанда, уйғур аптоном райониниң чен чүәнго, шөһрәт закир, ваң җүнҗиң қатарлиқ рәһбәрлири 24-вә 25-ноябир күнлири аптоном районлуқ партийә комитети нәзәрийә тәтқиқат мәркизи гурупписи билән бирликтә йиғин уюштуруп, хитай компартийәси сиясий бюросиниң үчинчи нөвәтлик "шинҗаң хизмити йиғини" ни өгиниш, ши җинпиңниң сөзиниң роһини тәтқиқ қилип, уни қәтий әмәлийләштүрүш, "шинҗаңни башқуруш истратегийәси" омумий нишанини мустәһкәм сақлаш, йеңи дәврдә "шинҗаң хизмити" дә йеңи вәзийәт яритиш дегәнләрни тәкитлигән.

Йиғинда тәкитләнгән ноқтилар хитай һөкүмитиниң уйғур елида иҗра қилип келиватқан юқири бесимлиқ сиясәтлирини йәниму күчәйтидиғанлиқидин дерәк беридикән.

Чен чүәнго йиғиндики сөзидә мундақ дегән: "шинҗаңда узун муддәтлик әминлик қурулушида чиң туруп, ‹җуңхуа миллити' еңини шәкилләндүрүшкә әһмийәт бериш, җуңхуа миллити еңи вә тарихини шинҗаңниң кадирлар маарипи, яшлар маарипи вә иҗтимаий маарипқа сиңдүрүш керәк. . . ‹Бир гәвдә болуш', ‹милләтләр иттипақлиқ вә достлуқ паалийити', ‹милләтләр иттипақлиқи тәрбийәси' ни күчәйтип, һәр қайси милләтләрни бирләштүрүш, җуңхуа миллити җәмийитиниң еңини чоңқур йилтиз тартқузуш керәк. Ислам динини хитайлаштурушни илгири сүрүп, ашқунлуқни тизгинләш хизмәтлирини йәниму чоңқурлаштуруш керәк. . ."

Чәтәлләрдики көзәткүчиләрниң қаришичә, чен чүәнгониң сөзлири хитай һөкүмитиниң уйғурларни ассимлатсийә қилип йоқитишни мәқсәт қилған сиясәтлирини күчәйтип иҗра қилидиғанлиқини көрситип беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт