Америка мәркизий ахбарат идариси хитайға тақабил туруш үчүн алаһидә хизмәт гурупписи қурмақчи икән

Мухбиримиз җәвлан
2021-08-13
Share

Әһвалдин хәвәрдар шәхсләрниң ашкарилишичә, америка мәркизий ахбарат идариси (CIA) американиң әң чоң истратегийәлик рәқиби болған хитайниң әһвалини техиму яхши игиләш үчүн "хитай ишлири мәркизи" қурмақчи икән.

"бломберг" ториниң хәвиригә қариғанда, бу тәклипни америка мәркизий ахбарат идарисиниң башлиқи виллиям бурнис оттуриға қойған. Әгәр "хитай ишлири мәркизи" қурулуп қалса, америка мәркизий ахбарат идарисиниң муһим мәнбәлиридин әң башта бәһримән болидиған мустәқил орган болидикән. Шундақ болғандила хитайға мунасивәтлик ишларда адәм күчи, байлиқ вә сиясәтчиләрни қолға кәлтүрүш җәһәттә актип рол ойниялайдикән.

Америка мәркизий ахбарат идарисиниң бир баянатида мундақ дейилгән: "худди виллиям бурнис ейтқандәк, хитайға тақабил туруш униң биринчи вәзиписи. Америка мәркизий ахбарат идариси һазир бу вәзипини қандақ қилғанда яхши орунлашниң әмәлий пиланлирини түзүватиду".

Америка мәркизий ахбарат идарисидики бир хадимниң ашкарилишичә, бу органдики кишиләрниң көпинчиси мустәқил бир хитай ишлири мәркизи қурушниң зөрүрлүкини һес қилған болсиму, бүгүнгичә бирәрси һәрикәткә өтмигән икән.

Америка мәркизий ахбарат идарисиниң һазирқи башлиқи вилям бурнис тәҗрибилик дипломат болуп, "хитайниң мәқсити американиң орнини елип, дунядики әң күчлүк вә әң тәсири чоң дөләткә айлиниш" дегән; хитайниң дүшмәнлик вә зораванлиқ билән дуняға һаким болушқа урунушлирини америка үчүн тәһдит дәп қариған. У америка дөләт мәҗлиси истихбарат комитетиға қилған сөзидә: "америка мәркизий ахбарат идариси үчүн ейтқанда, хитай ишлири мәркизи қуруш, хитай мутәхәсислири қошунини давамлиқ күчәйтиш салмиқи еғир вә тәхирсиз иштур. Буниң үчүн тил билидиғанларни көпәйтиш, хадимларни тәңшәш, мәнбә тәқсимләш ишлирини яхши орунлашқа тоғра келиду" дегән.

2017-Йил трамп һөкүмити мәзгилидә, америка мәркизий ахбарат идариси шималий корийәниң ядро тәһдитигә тақабил туруш үчүн "шималий корийә ишлири мәркизи" қурған болуп, әйни чағда бу һәқтә берилгән баянаттиму охшашла "мәркизий ахбарат идарисиниң шималий корийәгә мунасивәтлик хизмәтлиригә толуқ йетәкчилик қилиш" оттуриға қоюлғаникән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт