Хитай һөкүмәт таратқулири обаманиң далай лама билән көрүшкәнликигә күчлүк инкас қайтурған

Мухбиримиз қутлан
2016.06.20

Игилинишичә, 16-июндин буян хитай һөкүмәт таратқулири америка президенти обаманиң ақсарайда тибәтләрниң роһаний даһийси далай лама билән көрүшкәнликигә күчлүк инкас қайтурған.

Хәлқ ториниң илгири сүрүшичә, 15-июн күни америка президенти обама далай ламани ақсарайда күтүвалғандин кейин, хитай һөкүмәт таратқулирида “далай лама ‛қарта өйи‚ дин чиқалмиди”, “вашингтонда бир мәйдан сиясий оюн қоюлди” қатарлиқ хәвәр вә обзорлар елан қилинған.

Бу һәқтики хитай һөкүмәт хәвәрлиридә мундақ дейилгән: “бу, обаманиң вәзипә өтәш мәзгилидә далайни төтинчи қетим қобул қилиши. Бултурқи ақсарайниң ‛наштилиқ дуа-тилавәт йиғилиши‚ да көрүшкинини қошуп һесаблиғанда, иккийлән җәмий бәш қетим көрүшкән болуп, бил килинтон яратқан америка президентиниң далайни алтә қетим күтүвелиш рекортиға тәңләшкән. Бирақ, җуңголуқларниң қаришичә, бундақ рекорт унчә шәрәплик әмәс.”

Хәвәрдә йәнә мундақ дейилгән: “далайниң америкиға пат-пат зиярәткә келишидә мәйли қандақ байрақни көтүргән, қандақ ниқабланған болушидин қәтийнәзәр, униң пәқәт бирла сиясий мәқсити бар. У болсиму тибәт мәсилисини хәлқаралаштуруш вә җуңгоға қарши бөлгүнчилик һәрикитини күчәйтиштин ибарәт, халас.”

Хәвәрдә йәнә америкиға һуҗум қилип мундақ дейилгән: “америка президентлириниң далай ламани пат-пат қобул қилиши, мәйли қандақ ‛төвән муқам‚ яки ‛ғәйрий рәсмий көрүшүш‚ болсун вә яки ‛сиясийни тилға алмай пәқәтла дин вә мәдәнийәт үстидә сөһбәтлишиш‚ болсун, түп негизидин алғанда, америка далай ламани бир сиясий шаһмат қиливатиду, халас.”

Көзәткүчиләр, гәрчә хитай һөкүмәт таратқулири бу һәқтики инкаслирида обаманиң далай лама билән көрүшкәнликигә мәнситмигәндәк бир муқамни ипадә қилишқа тиришқан болсиму, лекин ишләткән сөз-ибарилиридә өзлириниң “қорсақ ағриқи” ни чандуруп қойди, дәп қаримақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.