Д у қ: «хәлқарани уйғур мусапирлири вә сиясий панаһлиқ тилигүчилириниң тәқдиригә диққәт қилишқа чақиримиз»

Мухбиримиз әркин
2020-06-22
Елхәт
Пикир
Share
Принт

Дуня уйғур қурултийи 20-июн дуня мусапирлар күни мунасивити билән баянат елан қилип, хәлқара җәмийәтни дуняниң һәр қайси җайлиридики уйғур мусапирлири вә сиясий панаһлиқ тилигүчилириниң тәқдиригә диққәт қилишқа вә уларни қоғдашқа чақирған.

Баянатта тәкитлишичә, «уйғур мусапирлири хитайниң инсанийәткә қарши җинайити вә дәһшәтлик җазалашлиридин қечип қутулған болсиму, лекин бу уларниң азап-оқубәтлиригә хатимә берәлмигән. Улар йәнила бихәтәр әмәс болуп, нурғун бесим вә йочуқларға дуч кәлмәктә шундақла хитайниң узун қоли уларға созулуп, уларниң азаб-оқубәтлирини давамлаштурмақта» икән.

Баянатта хитай һөкүмитиниң уйғур мусапирлириниң изини қоғлап, саһипхан дөләтләргә уйғур мусапирлири вә сиясий панаһлиқ тилигүчилирини қайтуруп бериш һәққидә бесим ишлитип кәлгәнлики, қайтуруп берилгәнләрниң «из-дерәксиз ғайиб болуш, тутқун қилиниш, тән җазаси вә башқа ғәйрий инсаний муамилиләргә дучар болуп кәлгәнлики» тәкитләнгән. Дуня уйғур қурултийиниң илгири сүрүшичә, йеқинқи 20 йил ичидә 16 дөләттин 300 дин артуқ уйғурниң хитайға мәҗбурий қайтуруп берилгәнлики дәлилләнгән.

Баянатта хитайниң уйғур мусапирлириға паспорт йеңилап беришни рәт қилиши нурғун уйғур мусапирлирида дөләт тәвәликисиз қелиш хәвпини пәйда қилғанлиқи, корона вируси юқуми уларниң әһвалини техиму еғирлаштурғанлиқи, түркийәдики аилисидин айрилған оқуғучилар, балилар вә тул аниларниң әһвали техиму қийинлашқанлиқи тәкитләнгән. Баянатта тәләп қилишичә, һәр қайси дөләтләр «уйғур мусапирлири вә сиясий панаһланғучилирини қайтуруп беришни тохтитиши, уларни қоғдиши, хитай һөкүмитидин уларниң аилиси билән болған алақисини әслигә кәлтүрүшни тәләп қилиши, б д т мусапирлар мәһкимиси уларға қарита һәқиқий мәнидики үнүмлүк тәдбирләрни елиши керәк» икән.

Пикирләр (0)
Share
Толуқ бәт