Әнәс кантәрниң тохтамсиз қелиши зор диққәт қозғиди

Хитай һөкүмитиниң залимлиқини, шуниңдәк уйғур дияридики қирғинчилиқини ашкара тәнқидләш билән тонулған америкадики васкетбол маһири әнәс кантәр йеқинда “бостон клетлиқлар” командисидин “хюстон ракетаси” командисиға алмаштурулған иди. Әмма күтүлмигәндә “хюстон ракетаси” командиси әнәс кантәр билән болған тохтамни бикар қилғанлиқини елан қилған.

“дөләтлик тәқриз” гезитиниң 15-февралдики хәвиридә ейтилишичә, әнәс кантәр билән бирликтә алмашқан башқа маһирлар “хюстон ракетаси” командисида қелип қалған болуп, әнәс кантәрла бу командидин чиқириветилгән. Мәлум болушичә, әнәс кантәр бейҗиң қишлиқ олимпик мусабиқисини толуқ байқут қилиш чақириқини оттуриға қойған, шуниңдәк хитай васкетбол чолпини яв миңни “хитай һөкүмитиниң қорчақ топчиси” дәп атиған икән. Америка васкетбол бирләшмиси (NBA) дики бу икки даңлиқ командиниң әнәс кантәргә тутқан муамилиси нөвәттә ташқий дуняниң хитай һөкүмитигә болған зор гуманини қозғимақта икән. Бәзиләр болса буниң тәсадипийлиқ әмәсликини алаһидә тәкитлимәктә икән. Болупму “хюстон ракетаиси” ниң сабиқ идарә һәйәтлиридин дарйл морей 2019-йили хоңкоңдики демократийә һәркитини һемайә қилип тиветтерда учур йоллиғанда, мәзкур команда хитай миқясидики “хәлқ һуҗуми” ға дуч кәлгән иди.

Хәвәрдә ейтилишичә, әнәс кантәр илгирики радийо-телевизийә сөһбәтлиридә өзиниң NBA дин сиқип чиқирилиш еһтимали барлиқини тилға алған икән. Әмма бу әһвал хитай һөкүмитини бәкла хошал қиливәткән болуп, хитай һөкүмитиниң карнийи болған “йәр шари вақти гезити” бу һәқтики обзор мақалисида “әнәсниң ‛хюстон ракитаси‚ командисидин чиқириветилиши, улар үчүн бир вирусни тазилиғанлиққа баравәр. Хәлқимиз әмди бостон командисиниң топ мусабиқисини көриду” дегән. Улар буниңдин илгири әнәс кантәрни “америка мәркизий ахбарат идариси (CIA) ниң җасуси” дәп елан қилған иди.