En'gliye parlaménti küntaxta mehsulatlirigha “Qul emgiki” arilashmighan bolushini telep qildi

En'gliye parlaménti tashqi ishlar alahide komitéti ezaliri yéqinda “Énérgiye qanunini tüzitish layihesi” ni otturigha qoyghan bolup, uningda chong tiptiki küntaxta mehsulatlirigha “Qul emgiki” ning arilashmighan bolushini ispatlash telep qilin'ghan. Eger en'gliyening nöwettiki hökümet ministirliri bu qanun layihesini ret qilsa, en'gliye Uyghur rayonidiki mejburiy emgek mehsulati bolghan küntaxtilarni tökme qilip sétish dölitige aylinidiken.

En'gliye “Muhapizetchi” torining 3-séntebir küni bergen xewirige asaslan'ghanda, “Énérgiye qanunini tüzitish layihesi” 9-ayning 5-küni muzakire qilinidiken. En'gliye parlaménti tashqi ishlar alahide komitétining re'isi elisiya kérnis (Alicia Kearns) we mezkur komitétning 7 neper ezasi otturigha qoyghan bu qanun layiheside, “Chet elning her qandaq ul eslihe qurulushi shirkiti tok miqdari 500 mégawattin yuqiri küntaxta mehsulatliri yaki küntaxta projéktini en'gliyege kirgüzmekchi bolsa, özlirining mejburiy emgek bilen chétishliqi yoqluqini ispatlap bérelmise, en'gliye pilan we nazaret idarisi ularni chekleydu” déyilgen.

En'gliye parlaménti tashqi ishlar alahide komitétining re'isi elisiya kérnis mundaq dégen: “Biz xitay hökümitining Uyghurlargha yürgüzüwatqan irqiy qirghinchiliqi heqqide sözleshtuq. Hökümetningmu emdi qattiqraq gep qilidighan waqti keldi. Ular bu qétim ‛énérgiye qanunini tüzitish layihesi‚ ni maqullash arqiliq, döletning muhim ul eslihe qurulushining ochuq-ashkara bolushi we mejburiy emgekning tesirige uchrimighan bolushigha kapaletlik qilsa bolidu” .

Melum bolushiche, Uyghur rayoni hazir küntaxta mehsulatlirining halqiliq xam eshyasi bolghan kiristalliq silitsiy bazisi bolup, dunya omumiy zapisining 35 pirsentidin 40 pirsentigiche igileydiken.