Хитай мәтбуатлири гумидики вәқәдә ғәрб мәтбуатлириниң "виҗдансизлиқ" қилғанлиқини илгири сүрди

Мухбиримиз ирадә
2017-02-16
Share

Хитайдики йәр шари вақти гезити 17-феврал күни тарқатқан инглизчә хәвиридә, ғәрб мәтбуатлирини" гумидики террорлуқ һуҗумини қоғдиди" дәп әйиблиди.

Хитай һөкүмитиниң авази һесаблинидиған йәр шари вақти гезити ғәрб мәтбуатлириниң гумидики вәқә һәққидики хәвәрлиридә дуня уйғур қурултийиниң инкасини асас қилғанлиқини қаттиқ тәнқид қилип, уларни виҗдансизлиқ вә террорлуққа икки хил өлчәм қойди дәп әйиблигән.

Хитай ахбарат васитилири 14-феврал күни гумида пичақлиқ 3 кишиниң террорлуқ һуҗуми қозғап 5 кишини өлтүргәнликини, 3 һуҗумчиниң нәқ мәйданда сақчилар тәрипидин етип ташланғанлиқини хәвәр қилған. Бирақ вәқәниң тәпсилати, һуҗумчи вә өлгүчиләрниң кимлики, вәқәниң чиқиш сәвәби һәққидә һечқандақ учур бәрмигән иди. Дуня уйғур қурултийи шу күнки баянатида, хитай һөкүмитиниң вәқә һәққидә башқа һечқандақ тәпсилатни елан қилмиғанлиқини әскәртиш билән биргә, райондики еғир бесимниң бир қисим кишиләрни мушундақ радикал йолларни таллашқа қиставатқанлиқини ейтқан. Хитай һөкүмити бу сөзгә нарази болуп, ғәрб ахбаратлириниң бу мәсилидики позитсийисини тәнқид қилған.

Бирақ, дуня уйғур қурултийи баянатчиси дилшат ришит бүгүн буниңға инкас қайтуруп, алди билән хитай һөкүмитини ғәрбтики ахбарат -учур әркинликигә һөрмәт қилишқа чақирди. Шундақла әгәр һәқиқәтән бу өзлири дегәндәк террорлуқ һуҗуми болса, ашу ғәрб мәтбуатлириниң мухбирлирини қорқмай, дадил һалда гумиға тәклип қилип, вәқәни тәкшүрүшигә йол қоюшқа үндиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт