Sibiriyedin kirgen soghuq hawa éqimining tesiride ürümchining témpératurisi dawamliq töwenleydiken

Muxbirimiz qutlan
2016-11-20

Igilinishiche, sibériyedin kirgen küchlük soghuq hawa éqimi 16-noyabir kéchidin 17-noyabirghiche Uyghur aptonom rayonining merkizi ürümchige qattiq tesir körsetken.

Gerche soghuq hawa éqimi kirgen mezgilde ürümchide qar yaghmighan bolsimu, emma témpératura shiddet bilen töwenligen. Ürümchi sheherlik hawarayini közitish istansi bergen melumatqa qarighanda, kelgüsi birqanche kün ichide ürümchining témpératurisi dawamliq töwenlep, otturihal qar yaghidiken.

Ürümchi shehirining ahaliliri bu yil ürümchide xazanlar téxi tel-töküs tökülmey turupla kechküzning ghayip bolup, zémistan qishning bashlan'ghanliqini bildürgen.

Melumki, ürümchi tipik ichkiy quruqluq iqlimigha mensup bir sheher bolsimu, lékin tengritéghining shimaliy étikige jaylashqanliqi üchün her yili qishta sibiriyedin kiridighan soghuq hawa éqimining küchlük tesirige uchraydiken.

Yéqinqi yillardin buyan ürümchining asasiy eslihe qurulushining téz sür'ette yéngilinishi, sheher kölimining zoriyishi bilen sheher nopusi shiddet bilen köpiyip, eslidiki 1 milyundin artuq ahalige ige otturihal sheherdin biraqla 5 milyun nopus yashaydighan chong sheherge aylan'ghan. Bu hal ürümchining su, muhit we issinish mesililiride jiddiychilik peyda qiliwatqanliqi melum bolmaqta.

Bu yil noyabirning otturiliridin bashlap ürümchide témpératurining biraqla töwenlep kétishi aqma nopusi shiddet bilen örlep ketken bu sheherning qishliq issinish mesilisige so'al peyda qilmaqtiken.

Igilinishiche, 18-noyabiridin hepte axirighiche témpératura dawamliq töwenlep ürümchi asasiy sheher rayonida kündüzdiki témpératura nöldin töwen 8 sélsiye giradus, etigen we kechtiki töwen témpératura nöldin töwen 15 sélsiye giradus etrapida bolidiken. Jenubiy sheher rayoni bilen ürümchi etrapidiki taghliq rayonlarning témpératurisi hetta nöldin töwen 20 sélsiye giradusqa yéqinlishidiken.