Һиларий клинтон демократлар партийәсидин президент намзатлиқиға көрситилди

Мухбиримиз җүмә
2016-07-27
Елхәт
Пикир
Share
Принт

Һиларий клинтон ханим демократлар партийиси тәрипидин бу нөвәтлик америка президентлиқ намзатиға көрситилип, америка тарихида президент намзатлиқиға көрситилгән тунҗи аял болуп қалди.

Һиларий клинтон сабиқ америка президенти бил клинтонниң ханими болуп, у 2009-йилидин 2013-йилиғичә америка дөләт ишлар министирилиқ вәзиписини атқурған.

У сәйшәнбә күни кәч филаделфийә шәһиридә чақирилған 2016-йиллиқ демократлар партийисиниң мәмликәтлик вәкилләр қурултийида намзатлиққа көрситилгән иди.

У, мурасимда өз партийәсиниң намзатлиқини қобул қилидиғанлиқини җакарлап мундақ деди: «әгәр һазир ухлимай бу паалийәтни көрүватқан кичик қизлар болса, мән шуни ейтай: бәлким мән тунҗи аял президент болуп қелишим мумкин, әмма араңлардики бириңлар чоқум кәлгүсидики [аял] президент болисиләр.»

Сабиқ президент клинтон әпәнди рәпиқиси һиларий ханимға юқири баһа бәрди вә униң америка нөвәттә йолуқуватқан хәтәрләрни пәсәйтәләйдиған бирдин ‏-бир намзат икәнликини билдүрди.

Бу нөвәтлик америка президентлиқ сайлими дуня миқясида, җүмлидин америкида террорлуқ һуҗумлири бир қәдәр көп көрүлигән мәзгилгә тоғра кәлди.
Америкида өткән 8 ай ичидила икки қетим террорлуқ һуҗуми йүз бәргән. Буларниң бири өткән йили 2-декабир калфорнийәниң сан бенардино шәһиридә, йәнә бир бу йил 13-июн флорида штатиниң орландо шәһиридә йүз бәргән террорлуқ һуҗумлири. Бу һуҗумларда аз дегәндә 63 адәм һаятидин айрилған, 70 тин артуқ адәм яриланған иди.

Һиларий клинтон бу юл 8-ноябир өткүзүлидиған америка президентлиқ сайлимида җумһурийәтчиләр партийисидин намзатлиққа көрситилгән доналд трамп билән риқабәткә чүшиду.

Әгәр у бу нөвәтлик сайламда утуп чиқалиса, америка тарихида сайланған тунҗи аял президент болуп қалиду.

Пикирләр (0)
Share
Толуқ бәт