Ички моңғулниң туңляв шәһиридики моңғуллар намайишида тутқунлар сани көпәйди

Мухбиримиз меһрибан
2016-04-14
Елхәт
Пикир
Share
Принт

Радийомиз игилигән әһваллардин мәлум болушичә, ички моңғулниң тоңляв шәһиригә қарашлиқ заручи алхулдурулчин базири сумрарулач кәнтидә 8-апрел башланған хитайниң алюмин завутиниң муһит булғишиға қарши наразилиқ намайиш сәвәблик тутқун қилинғанлар 14-апрел пәйшәнбә күни 8 гә йәткән. Әмма даириләр, чарвичиларға муһит булғиниш төләм пули берилидиғанлиқини уқтурған.

14-Апрел әтигән радиомизға әһвални баян қилған чарвичиларниң билдүрүшичә, базарлиқ сақчихана хадимлири 12-апрелдин башлап адәм тутушни башлиған. Шу күни тутқун қилинған намайишчилар башламчиси норшун һуричтин башқа йәнә 7 нәпәр моңғул чарвичи чаршәнбә, пәйшәнбә күнлири тутқун қилинған болуп, даириләр уларға қалаймиқанчилиқ чиқирип, чәтәл таратқулириға учур ашкарилаш қатарлиқ җинайәтләрни артқан.

Мәлум болушичә, чарвилири өлгән моңғулларниң алюмин завутиниң муһит булғишиға қарши наразилиқ намайишидин кейин, даириләр тутқун қилиш һәрикити елип бериш билән биллә, чарвичиларниң наразилиқини пәсәйтиш вә һөкүмәткә келидиған бесимни азайтиш үчүн чарвичиларға муһит булғиниш төлими беридиғанлиқиниму елан қилған.

Ички моңғулдики кишилик һоқуқ паалийәтчиси шиннаниң үндидар ториға йоллиған учуридин мәлум болушичә, базарлиқ һөкүмәт вә алюмин завути чарвичиларға 5 йиллиқ муһит булғиниши үчүн һәр бир аилигә 10 миң сом хәлқ пули әтрапида төләм төлинидиғанлиқини уқтурған. Әмма моңғулларниң зәһәрлинип өлгән чарвилири үчүн қанчилик төләм берилидиғанлиқи һәққидә һөкүмәт даирилири һазирғичә башқа хәвәр бәрмигән.

Пикирләр (0)
Share
Толуқ бәт