Ички моңғулдики наразилиқ намайиши болған кәнт қамал қилинди

Мухбиримиз әзиз
2016-04-20
Share

Мухбиримизниң ички моңғулниң туңляв шәһиридики моңғулларниң наразилиқ намайиши һәққидә 20-апрел күни әһвал игилишидин мәлум болушичә, наразилиқ намайиши башланған заруд хошунини түнүгүндин башлап сақчилар қамал қилған.

Игилинишичә, 18-апрел күни тәхминән икки йүз киши моңғул вә хитай йезиқидики пилакатларни көтүрүп заруд хошунлуқ һөкүмәт алдида намайиш қилип, хулин ғол алюмин завутини тақиветишни һәмдә яйлақ екологийисини қоғдашни тәләп қилған. Алақидар учурларда һазирқи қамал қилиш тәдбирлириниң мушу тәләпләр сәвәбидин қоллинилғанлиқи тәхмин қилинмақта.

Йәрлик чарвичиларниң радиомиз мухбирлириға билдүрүшичә, хитай даирилири чарвичиларниң тәләплиригә үч күн ичидә җаваб беридиғанлиқини билдүргән болсиму, түнүгүндин башлап хитай сақчилири заруд хошуниниң сирт билән болған алақисини үзүп ташлиған. Кәнттикиләрниң сиртқа чиқиши яки сирттики кишиләрниң мәзкур хошунға кириши бирдәк мәни қилинған. Бейҗиңдин кәлгән адвокатлар гурупписиму сақчиларниң соал-сорақлириға дуч кәлгән һәмдә уларниң "архунделен сом (кәнт)и тәрәпкә беришиға болмайдиғанлиқи" уқтурулған. Һазир мәзкур хошундики һәрқайси сомларниң еғизлирида сақчилар қаравуллуқта туруватқан болуп, йәрликтә телефон сигналиниң тосуп қоюливатқанқанлиқи мәлум.

Архунделин сомидики йәрлик моңғул чарвичиларниң радийомиз мухбирлириға билдүрүшичә, хулин ғол районидики алюмин завути йиллардин бери қоюп бәргән булғанма су вә башқа маддилар мәзкур районниң муһитини еғир дәриҗидә булғиған. Буниң билән нурғун чарвилар буниңдин зәһәрлинип өлүп кәткән.

Ички моңғулдики әһвалға охшишип кетидиған хитай карханилириниң ишләпчиқириш баһанисидә муһитни еғир дәриҗидә булғаш һадисиси уйғурлар районидиму көпләп көрүлгән болуп, радийомиз бу һәқтә мәхсус хәвәрләр бәргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт