Jim mekgawrén: xitay hökümiti irqiy qirghinchiliq jinayitidin hésab bérishi kérek

Amérika awam palata ezasi jim mekgawrén (Jim McGovern) 22-séntebir küni tiwéttérda uchur yollap: “Men Uyghur dostlirimgha awaz qoshup, birleshken döletler teshkilatini b d t kishilik hoquq ishxanisi yéqinda élan qilghan doklattin kéyin heriket qollinishqa chaqirimen. Xitay hökümiti choqum irqiy qirghinchiliq jinayiti we insanlarni xorlash qilmishigha jawabkar bolushi kérek” dégen.

Jim mekgawrinning bu uchuri amérika Uyghur birleshmisining xitaygha qarshi achliq élan qilish namayishi heqqidiki uchurigha qayturulghan inkas bolup, amérika Uyghur birleshmisining tiwéttir uchurida: “Uyghur lagér shahitliri sherqiy türkistandiki irqiy qirghinchiliqqa qarshi achliq élan qilish namayishining 3-künige qedem qoydi. Biz birleshken döletler teshkilatini Uyghur kishilik hoquq mesilisini hel qilishqa chaqiriq qilimiz” déyilgen.

Xitayning yillardin béri her xil usul-wasitiler bilen ijra qiliwatqan irqiy qirghinchiliq jinayiti bügünki künde Uyghurlarni qamal qilip ach qoyup öltürüsh sheklide dawam qiliwatqan bolup, amérikadiki lagér shahitliri bu jinayetni toxtitish üchün washn'gtonda achliq élan qilish namayishini bashlighanidi. Awam palata ezasi jim mekgawrén yuqiriqi uchur arqiliq her waqit Uyghurlarni qollaydighanliqini bildürgen, uningdin bashqa, amérika kéngesh palata ezasi kirs simismu 21-séntebir küni qilghan sözide, xitayning ach qoyup öltürüsh sheklidiki irqiy qirghinchiliq jinayitini eybligen.