Истанбулдики рейно ресторанини қанға бойиған террорчиниң кимлики айдиңлашқан

Мухбиримиз шөһрәт һошур
2017.01.04

Бүгүн түркийә ташқи ишлар министири чавушоғлу истанбулдики рейно рестораниға һуҗум қилған террорчиниң кимликиниң айдиңлишип болғанлиқини елан қилған, әмма ашкарилимиған.

Мәзкур террорлуқ вәқәси йеңи йил кечиси йүз бәргән. Вәқәдә аптоматлиқ бир террорчи кәчлик кулубқа бесип кирип кулубтикиләрни қара-қоюқ оққа тутқан. Йәттә минутчә бирқанчә қетим оқдан алмаштурған террорчи, қирғинчилиқ елип барғандин кейин қоралини ташлап вә кийимини алмаштуруп, кулубтин қачқан. Вәқәдә 12 си түрк, қалғанлири чәтәллик болған 39 киши өлгән, 65 киши яриланған. 4 Күндин бери түркийә сақчилири мәзкур террорчини қолға чүшүрүш үчүн кәң көләмлик оператсийә елип бармақта.

Вәқә һәққидики хәвәр вә мулаһизиләрдә террорчиниң кимлики билән бирликтә, униң мәргәнлики, тәмкинлики, тәҗрибиликлики вә тәбиитидики вәһшийлики диққәт мәркизи болмақта. Һазирғичә берилгән түркийә хәвәрлиридә террорчиниң оттура асиялиқ икәнлики җәзмләштүрүлүш билән бирликтә, униң қирғиз, өзбек яки уйғур болуп қелиш еһтималлиқи илгири сүрүлмәктә.

Сабаһ гезитиниң бу һәқтики бир хәвиридә баян қилинишичә, түркийә сақчилири террорчиниң кимликини дәсләпки күнила җәзмләштүрүп болған, әмма террорчи техи тутулмиған болғачқа ашкарилашни тоғра көрмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.