Хитай җәнубий деңизда америкиниң бир су асти тәкшүрүш әсвабини қолға чүшүрүвалған

Хитай деңиз армийәси 15‏-декабир җәнубий деңизда америкиниң бир адәмсиз су асти тәкшүрүш әсвабини қолға чүшүрүвалған. Америка һөкүмәт әмәлдарлириниң билдүрүшичә, америка тәрәп хитайдин су асти тәкшүрүш әсвабини қайтуруп беришни рәсмий тәләп қилған.

Америка дөләт мудапиә министирлиқиниң баянатчиси җәф дәйвис җүмә күни мухбирларға учур берип, мәзкур адәмсиз су асти тәкшүрүш әсвабиниң җәнубий деңизда қанунлуқ һәрбий өлчәм мәшғулати елип бериватқанлиқини билдүрди. У, “бу игилик һоқуқлуқ бир әсваб, униңда инглизчә қилип, бу америка дөләт мүлки, уни су йүзигә чиқиришқа болмайду дәп йезилған” дәп көрсәтти.

Америка әмәлдарлириниң билдүрүшичә, бу вәқә америкиниң “бавдич” намлиқ деңиз тәкшүрүш парахоти мәзкур әсвабни сүзүвелишқа тәйярлиқ қиливатқан мәзгилдә йүз бәргән. Америка тәрәп, вәқә филиппинниң субик қолтуқиниң 80 километир ғәрбий шималида йүз бәргәнликини билдүрди.

Америка дөләт мудапиә министирлиқиниң баянатида көрситишичә, хитай деңиз армийәсиниң ASR 510 типлиқ бир парахоти америкиниң “бавдич” намлиқ парахотиға йеқинлишип, андин кичик типлиқ бир парахот билән су асти тәкшүрүш әсвабини тутувалған. “бавдич” намлиқ парахот симсиз аппарат арқилиқ хитай парахоти билән алақә қуруп, тәкшүрүш әсвабини дәрһал қайтуруп беришни тәләп қилған болсиму, әмма хитай тәрәп пәрва қилмиған.

Америка дөләт мудапиә министирлиқи баянатчиси җәф дәйвис, “бу, биз тәсәввур қилалайдиған кәспий деңиз армийәсиниң һәрикити әмәс” дегән.