Америка кеңәш палата әзалири қарар лайиһиси сунуп, 2022‏-йиллиқ қишлиқ олимпикниң хитайда өткүзүлмәсликини тәләп қилди

Мухбиримиз әркин
2020-03-09
Share

Америка кеңәш палатасиниң 11 нәпәр әзаси өткән һәптә қарар лайиһәси сунуп, 2022‏-йиллиқ қишлиқ олимпик мусабиқисиниң бир милйондин артуқ уйғур вә башқа мусулманларни тутқун қилған хитайдәк бир дөләттә өткүзүлмәсликини тәләп қилған. Қарар лайиһисидә, хәлқара олимпик комитетиниң бейҗиң қишлиқ олимпик мусабиқисини башқа дөләткә йөткиши тәләп қилинған.

Мәзкур қарар лайиһисини америка кеңәш палата әзаси рик скот билән әд маркей сунған болуп, униңға җим инхоф, дик дурбен, марта миксалей, дов җонес, марку рубио, там каттон қатарлиқ әзалар имза қойған. Қарар лайиһисидә, олимпик мусабиқисиниң кишилик һоқуққа, инсанларниң иззәт-етибариға һөрмәт қилидиған бир дөләттә өткүзүлүши керәклики, лекин хитайниң "бир милйондин артуқ уйғур, қазақ, қирғиз қатарлиқ мусулманларни тутқун қилип, диний кимликни йоқитиш мәқситидә қурулған 1200 дәк ‹кәспий тәрбийәләш мәркәзлири' намидики йиғивелиш лагерлириға қамиғанлиқи" тәкитләнгән. Қарар лайиһисидә йәнә "хитай һөкүмитиниң қошмақ туғқан вә бир аилә болуш программисини йолға қоюп, хитай әркәк "туғқанлар" ни шинҗаң уйғур аптоном районидики уйғур аилиләрни назарәт қилишқа вә йиғивелиш лагерлиридики әркәкләрниң аяллири билән қәрәллик бир орунда йетишқа орунлаштурғанлиқи, буниңға наразилиқ билдүргән аилиләрниң тәқибләшкә вә йиғивелиш лагерлириға қамилиши мумкинлики" билдүрүлгән.

Кеңәш палата әзаси җим инхоф өзиниң немә үчүн мәзкур қарар лайиһәсигә имза қойғанлиқи һәққидә тохтилип, "хитай компартийәси җуңго хәлқигә давамлиқ зулум қиливатиду, биз буни шинҗаңдики ‹қайта-тәрбийәләш' лагерлирида вә шяңгаңда ениқ көрдуқ. Мән 2022-йиллиқ қишлиқ олимпик мусабиқисиниң бейҗиңда өткүзүлүп, компартийәниң қилмишиға кәңчилик қилишниң һечқандақ сәвәбини көрүп бақмидим" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт