Һиндистан һөкүмити кәшмир мәсилисини һәл қилишта хитайдин үлгә елишни истимәктә

Мухбиримиз әзиз
2019.08.09
Share on WhatsApp
Share on WhatsApp

Узундин буян һиндистан һөкүмитиниң бешини ағритип келиватқан ишларниң бири кәшмир мәсилиси һесаблиниду. Йеқинда һиндистанниң бу җәһәттә хитай һөкүмитини үлгә қилишқа қизиқип қеливатқанлиқи мәлум болди. CNN Ниң анализчиси җеймис гриффис имзасида 8-авғуст елан қилинған бу һәқтики мақалида дәл мушу мәсилиләр тәһлил қилиниду.

Апторниң баян қилишичә, уйғур дияри билән кәшмир нурғун җәһәттә охшишип кетидикән. Биринчидин, һәр иккиси мустәқиллиқни истәватқан районлар икән; иккинчидин, һәр икки райондики асаслиқ аһалә мусулманлар икән; үчинчиси, һәр икки районниң контроллуқ һоқуқини тутуп туруватқанлар бирдәк йәрлик билән һечқандақ ортақлиқи йоқ “капир” һөкүмәт болуп, шу җайлардики мусулманлар һәрқачан өзлирини “барғансери еғир бесимларға дуч келиватимиз” дәп һес қилмақта икән. 

Мақалида көрситилишичә, уйғурларниң өз юртлирида иккинчи дәриҗилик пуқраға айландурулуши, хитай аққунлириниң көпләп көчүп келиши билән уйғурларниң аз санлиққа айлиниши, буниңға қошулуп йеқинда мәлум болған икки милйончә уйғурниң лагерларға қамилишидәк қабаһәтниң оттуриға чиқиши һиндистан һөкүмитини қизиқтуруп кәлмәктә икән. Болупму һиндистан баш министири нарендра моди хитай һөкүмитиниң уйғур диярини тинҗитипла қалмай, бәлки йәнә бу җайға миңлиған хитай саяһәтчиләрни елип кәлгәнликини көрүп бу хилдики “мувәппәқийәтлик тәҗрибә” ни кәшмир райониға тәдбиқлашни ойлашмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт