Хәлқара көчмәнләр күнидә көчмәнләргә адил муамилә қилиш тәләп қилинди

Мухбиримиз ирадә
2014-12-18
Елхәт
Пикир
Share
Принт


Бүгүн, 18 - декабир хәлқара көчмәнләр һоқуқи күни. Бирләшкән дөләтләр тәшкилатиниң бүгүн елан қилған баянатидин мәлум болушичә, 2014 - йили инсанлиқ тарихида көчмәнләр сани әң көп болған бир йил болуп, дуня миқясида өз дөлитидин айрилип башқа бир дөләттә яшаватқан вә ишләватқан көчмән сани 232 милйонға йәткән. Буниң билән биргә, бу көчмәнләргә қаритиливатқан екиспилататсийә вә кәмситишму күчәйгән бир йил болған.

Б д т кишилик һоқуқ алий комиссари зейид һүсәйин бүгүнки баянатида, көчмәнләрниң кишилик һоқуқи вә иҗтимаий һоқуқлириниң капаләткә игә қилиниши, уларниңму башқилар билән охшаш муамилә көрүши керәкликини тәкитлигән вә буниң йеңи бир йилдики муһим хизмәтләрниң бири болидиғанлиқини тәкитлигән.

Йеқинқи йиллардин буян хитай һөкүмитиниң уйғур елидики бесим сияситиниң артишиға әгишип, дуняниң охшимиған җайлириға көчүп бериватқан уйғурларниң саниму ешип бармақта. Паспорт қейинчилиқи сәвәбидин қачақ йоллар арқилиқ чәтәлгә қачмақчи болған нәччә йүз уйғур болса нөвәттә қанунсиз көчмән, дәп тайландта тутуп турулмақта. Бирақ кишилик һоқуқ комиссари зейид һүсәйин бүгүнки сөзидә, қанунсиз көчмән дегән уқумниң хаталиқини, буниң, бу кишиләрниң һоқуқиниң дәпсәндә қилинишиға йол ечип бәрмәслики керәкликини агаһландурған. У мундақ дегән : «қанунсиз адәм дәйдиған бир уқум йоқ. Мәйли қанунлуқ көчмән болсун яки қанунсиз көчмән болсун, уларниң һәммисиниң кишилик һоқуққа, адаләткә вә әркинликкә еришиш вә кишилик ғорури билән яшаш һоқуқи бар.»

Пикирләр (0)
Share
Толуқ бәт