Kodak shirkitining instagram sehipisidiki Uyghur éligha a'it resimlerni öchürüshi diqqet qozghidi

Dangliq foto-filim shirkiti kodak instragram sehipisidiki Uyghur éligha a'it resimlerni öchürüwetken.

Kodak shirkiti yéqinda özining inistagram sehipiside fransuz fotograf patrik wakning Uyghur éli menzirilirige a'it süretlirini élan qilghan idi. Bu fotograf Uyghur élida tartilghan bu süretlerge yazghan izahatida “Bu rayonda keng kölemde xalighanche tutup turush sistémisi quruldi, bu süretler shinjangning tuyuqsiz orwélche distopiye ichige chüshüp qalghanliqining pakiti” dégen sözlerni ishletken bolup, bu derhal xitay tor qollan'ghuchilirining naraziliqigha uchrighan.

Melum bolushiche, xitay taratquliri we tor qollan'ghuchilirining naraziliqi bilen kodak shirkiti Uyghur éli “Orwélliy distopiye” dep teswirlen'gen resimlerni instagram bétidin éliwetken.

Kodak shirkiti yene ündidar hésabatida “Xitay hökümiti we xitayning qanunigha hörmet qilidighanliqi” heqqide yazma bayanat élan qilip, bu atalmish “Uqushmasliq” üchün xitaydin kechürüm sorighan.

Halbuki, xitay hökümitining Uyghurlargha irqiy qirghinchiliq yürgüzüwatqanliqi, u yerde insaniyetke qarshi jinayet bilen shughulliniwatqanliqigha a'it xelq'araliq musteqil kishilik hoquq organlirining polattek pakitliri we lagér shahitlirining bayanliri mewjut. Chet ellerdiki Uyghur közetküchiler kodak shirkitining bu pakitlargha qarimay emeliyetni “Uqushmasliq” dep atishini qattiq tenqid qildi we “Kodak shirkiti menpe'etni közlep xitaygha boyun egdi,” dédi.