Әнглийә армийәси ишләткән күнтахтилар уйғур мәҗбурий әмгикигә четишлиқ болуп чиққан

Вашингтондин мухбиримиз әркин тәйярлиди
2023.12.05

Хәлқарада хитайниң уйғур мәҗбурий әмгәк мәһсулатлирини чәкләш чуқанлири күчийиватқан бир вақитта, әнгилийә армийәси ишләткән күнтахтилар уйғур мәҗбурий әмгикигә четишлиқ болуп чиққан. Әнгилийә ахбарат қанили - BBC ниң хәвәр қилишичә, әнгилийә армийәсиниң хитайдики уйғур мәҗбурий әмгикигә “зич бағлинишлиқ” дәп қаралған ширкәтләр ишләпчиқарған күнтахтиларни ишлитиватқанлиқи мәлум болған. Хәвәрдә, уйғур районида ишләпчиқирилған қуяш енергийәси күнтахтилириниң уйғур мусулманлирини експилататсийә қилиш билән бағлинишлиқ, дәп қарилидиғанлиқи тәкитләнгән.

BBC Ниң ейтишичә, әнгилийә армийәси өзиниң төт һәрбий әслиһәсидики қуяш енергийә күнтахтисиға 200 милйон фонд стерлиң мәбләғ аҗратқан икән. Әнгилийә дөләт мудапиә министирлиқи BBC ға тәминлигән мәлуматида, бу күнтахта мәһсулатлирини хитайдики җинко күнтахтиси ширкити, трина вә қчәллс қатарлиқ ширкәтләрниң тәминлигәнликини ашкарилиған.

Һалбуки, әнгилийә шефелд һаллам университети һелина кенниди кишилик һоқуқ вә хәлқара адаләт тәтқиқат мәркизи бу йил 7-айда елан қилған доклатида, юқириқи ширкәтләрниң мәһсулатлириниң уйғур райониға “зич бағлинишлиқ” икәнлики, бу ширкәтләр хитайниң уйғурларни “йөткәп ишқа орунлаштуруш программиси” ға қатнашқанлиқи, күнтахта мәһсулатлириниң дәсләпки ишләпчиқириш басқучи уйғур мәҗбурий әмгикигә башлинишлиқ икәнликини билдүргән. BBC Ниң ейтишичә, трина ширкити уларниң соалиға инкас қайтурмиған болсиму, лекин җинко күнтахтиси билән Qcells ширкити өзлириниң тәминләш зәнҗиридә мәҗбурий әмгәкниң йоқлуқиға капаләтлик қиливатқанлиқини илгири сүргән. Әнгилийә дөләт мудапиә министирлиқиниң баянатчиси BBC ға инкас билдүрүп, “тәминләш зәнҗириниң барлиқ тәрәплирини һәр вақит тәкшүрүп туридиған вә қәрәллик көзитип туридиған сағлам тәртиплиримиз бар” дегән. Лекин BBC ниң ейтишичә, шефелд һаллам университетиниң доклатини тәйярлиған тәтқиқатчилардин алан крафорд, өзлири байқиған дәлилләрниң йәнила күчкә игә икәнликини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.