Америка таратқулири уйғур елидики лагерларниң б д т да оттуриға қоюлушиниң зор ғәлибә икәнликини тәкитлиди

Мухбиримиз ирадә
2018-08-16
Елхәт
Пикир
Share
Принт

15-Авғуст күни, америкида чиқидиған «хаффиңтон почтиси» гезитидә «дуня хитайниң бир милйондин артуқ кишини йиғивелиш лагерлириға соливалғанлиқидин қандақ хәвәр тапти» мавзулуқ бир парчә мақалә елан қилинди.

Мақалидә бу һәптә бешида бирләшкән дөләтләр тәшкилати кишилик һоқуқ мутәхәссислириниң «хитай бир милйондин артуқ мусулман аз санлиқ милләт хәлқини мәхпий һалда лагерларға қамиди» дәп җакарлаш арқилиқ дуня ахбаратиниң күн тәртипини игилигәнлики, хитай һөкүмити өзиниң бу қиливатқанлириниң дуняға ашкарилинип кәтмәслики үчүн кәң көләмлик вә залимларчә қамал қилиш һәрикити елип барғанлиқини нәзәрдә тутқанда, б д т ниң юқиридики бу билдүргүсини һәрбир пуқраниң, журналистларниң вә һәрқайси кишилик һоқуқ органлириниң һәқиқәтни оттуриға чиқириш үчүн көрсәткән тиришчанлиқиниң зор бир ғәлибиси, дәп қарашқа болидиғанлиқи баян қилинған.

Мақалидә уйғур кишилик һоқуқ қурулушиниң тәтқиқатчиси зубәйрә ханим зиярәт қилинған болуп, у сөзидә «уйғурлар сүкүт қилиш арқилиқ бир нәтиҗигә еришәлмәйдиғанлиқини һес қилди,» дейилгән.

Мақалидә хитай һөкүмитиниң өткән йилидин буян мәхпий һалда уйғурларни йиғивелиш лагерлириға қамаш, чәтәлләрдики уйғурларғиму бесим ишлитиш вә уларниң учурини йиғиш қатарлиқ һәрикәтлирини башлиғанлиқи әскәртип өтүлгән.

Мақалида йәнә уйғур елида йүз бәргән бу еғир инсан һоқуқи дәпсәндичиликлириниң һәрқайси хәлқара ахбарат органлириниң журналистлири тәрипидин хәвәр қилинғанлиқи, «әркин асия радиоси» мухбирлириниң аилә тавабиатлириниң тутқун қилинғанлиқ әһвалини ашкарилиши, кишилик һоқуқни көзитиш тәшкилати вә башқа кишилик һоқуқ мутәхәссислириниң бирдәк күч чиқириши нәтиҗисидә ахири уйғур районидики еғир вәзийәтниң дуня җамаәтчиликигә ашкариланғанлиқидәк тәпсилатлар баян қилинған.

Пикирләр (0)
Share
Толуқ бәт