Хитай һөкүмитиниң лагерлардики өлүм вәқәсини вирусқа бағлаш еһтималлиқи әндишә қозғимақта

Мухбиримиз әзиз
2020-02-06
Елхәт
Пикир
Share
Принт

Пүтүн дуняни сарасимигә селиватқан хитайдики таҗисиман вирус вәһимиси һазирқи ахбарат вастилири көпләп хәвәр қиливатқан темилардин болуватқанда хитай һөкүмитиниң уйғур дияридики лагерларда көпләп көрүлүватқан өлүм вәқәлирини мушу вирусқа бағлап йошуруп кетиш еһтималлиқи нурғун уйғурларни әндишигә салмақта.

Таҗисиман вирусниң адәмдин адәмгә һәмдә һавадин тарқилиштәк қорқунчлуқ алаһидилики хитайда бәш йүздин артуқ кишиниң һаятини ахирлаштурди. Һалбуки, уйғур дияридики «үч милйондин артуқ киши қамалған» дәп тәхмин қилиниватқан лагерларда роһий вә җисманий җәһәтләрдики қийнақ сәвәбидин һәр күни охшимиған санда өлүм вәқәлири көрүлүп кәлмәктә. Әнглийәдики обзорчи емма бразел 6-феврал күни мәхсус мақалә елан қилип, муһаҗирәттики уйғурларниң мушу хил әндишисини баян қилди. 

Вухән шәһридин тарқиливатқан таҗисиман вирус билән юқумланғучи нурғун хитайниң уйғур дияриға қечип келивалғанлиқи һәмдә нөвәттә аз дегәндиму 36 кишиниң юқумлинип болғанлиқи мәлум. Әмдиликтә хитай даирилириниң лагерлардики өлүм вәқәлирини мушу юқумлуқ кесәлгә артип қоюш арқилиқ өзлирини мәсулийәттин елип қечиш еһтималлиқи көплигән соалларға дуч кәлмәктә. Америкадики уйғур паалийәтчи бәһрам синташ бу һәқтә сөз қилип: «нөвәттә уруқ-туғқанлири лагерға қамалған һәммила уйғур мушу һалдин әндишигә чүшмәктә,» дегән.

Пикирләр (0)
Share
Толуқ бәт