Ма шиңруй “шинҗаңда хитай асасий еқимни омумлаштуруш” ни тәкитлигән

Уйғур аптоном районлуқ парткомниң секретари ма шиңруй 7-феврал күни үрүмчидә, уйғур елиниң һәрқайси җайлиридики тәшвиқат бөлүми башлиқлириға мәхсус йиғин ечип, “шинҗаңниң идийә вә мәдәнийәт-сәнәт хизмәтлиридә асасий еқимни омумлаштуруш” һәққидә йолйоруқ бәргән.

Хитайниң “тәңритағ тори” ниң хәвиридин қариғанда, ма шиңруй бу йиғинда, “идийә вә мәдәнийәт хизмитини илгири сүрүш үчүн уйғур елидә хитай асасий еқим еңини вә җуңхуа миллити ортақ гәвдиси еңини мустәһкәмләш” ни тәкитлигән. У мундақ дегән:

“шинҗаңда хитай услубидики заманивилаштурушни чиң тутуп, асасий еқимдики идийә вә җамаәт пикрини давамлиқ күчәйтимиз. Шинҗаңға мунасивәтлик ташқи тәшвиқат вә җамаәт пикри күришини күчәйтип, җуңхуа милләтлири еңи тәрәққиятини илгири сүримиз. Шинҗаңниң тарихи вә мәдәнийитини тәтқиқ қилишни күчәйтип, җуңхуа мәдәнийитиниң ортақлиқи вә бир гәвдилишишниң тарихи пакитлирини намаян қилимиз.”

Юқириқи хәвәрдә дейилгән гәпләр дәл хитайниң чаған байрими мәзгилидә уйғур елиниң һәрқайси җайлирида чағанлиқ паалийәтләр техиму кәң әвҗ алдурулған, уйғурлар болса пүтүнләй хитайчә адәт вә қияпәтләр билән бу байрамни тәбрикләшкә уюштурулған әһвалға мас кәлмәктә. Бу һәқтә радийомизға сөз қилған мутәхәссисләр, буниң хитай һөкүмитиниң уйғур елиниң мәдәнийәт тарихини аталмиш “җуңхуа мәдәнийити” чәмбирики ичидә қайта йезип чиқиш, барлиқ мәдәнийәт һадисилирини хитай ейтими билән шәрһләш икәнликини, уйғур елидики барлиқ мәдәнийәт мираслириниң хитай мәдәнийитиниң бир қисми қатарида тәшвиқат қилиниватқанлиқини билдүргәниди.

Ма шиңруйниң юқиридики йолйоруқидин, бундақ һәрикәтләрниң йәниму күчийидиғанлиқи мөлчәрләнмәктә.