Ма шиңрүй уйғур елидики сиясәтләргә ши җинпиңниң биваситә арилашқанлиқини билдүргән

Хитай һөкүмити 14-нөвәтлик хәлқ қурултийи 2-қетимлиқ йиғини бейҗиңда ечиливатқан мәзгилдә, уйғур аптоном райониниң партком секретари ма шиңрүй, уйғур райониниң рәиси әркин тунияз қатарлиқларниң башчилиқида мухбирларни күтүвелиш йиғини өткүзүлгән.

Ма шиңрүй бу йиғинда мухбирларниң соалиға җаваб бәргәндә қилған бир сөзидә, уйғур елидә йолға қоюлуватқан сиясәтләргә хитай компартийәси баш секретари ши җинпиңниң башчилиқ қилғанлиқини билдүргән.

 У мундақ дегән: “хитай компартийәси 18-нөвәтлик мәмликәтлик қурултийидин буян, йолдаш ши җинпиңни ядро қилған партийә мәркизи комитети шинҗаң хизмитигә интайин әһмийәт бәрди. Баш секретар ши җинпиң партийәниң шинҗаңни башқуруш истратегийәсини өзи бир қоллуқ пиланлиди, хизмәтләрни өзи орунлаштурди вә өзи илгири сүрди”.

Ма шиңрүйниң бу сөзи хитай һөкүмити йиллардин буян уйғурларни бастурушни нишан қилған сиясәтләргә ши җинпиңниң биваситә йолйоруқ бәргәнликини ашкарилап бәргән. Бу сиясәт кәлтүрүп чиқарған ақивәтләр америка қатарлиқ демократик дөләтләрниң һөкүмәтлири вә парламентлири тәрипидин “ирқий қирғинчилиқ” дәп һөкүм қилинғаниди. 

Уйғур райониниң рәиси әркин туниязму икки йиғин мәзгилидә елан қилған очуқ хетидә уйғур районида “аләмшумул өзгиришләр барлиққа кәлгәнлики” ни илгири сүрүп, бу өзгиришләрниң баш йетәкчисиниң ши җинпиң икәнликини билдүргән.