Аризона штати уйғур мәҗбурий әмгикигә четишлиқ хитайниң токлуқ аптомобиллирини чәкләш қанун лайиһәси сунған

Вашингтондин мухбиримиз әркин тәйярлиди
2024.04.05

‍Американиң аризона штатлиқ кеңәш палатаси мәҗбурий әмгәк вә балилар әмгикигә четишлиқ токлуқ аптомобилларни чәкләш һәққидә бир қанун лайиһәси сунған.

Мәлум болушичә, бу қанун лайиһәси бу штаттики һәрқандақ һөкүмәт орниниң аптомобил мәһсулатлирини ишләпчиқиришта униңға һечқандақ мәҗбурий әмгәк яки балилар әмгики арилашмиғанлиқиға қәсәм қилип, капаләт бәрмигән һәрқандақ ширкәтниң аптомобиллирини сетивелишини чәкләйдикән. 1341-Номурлуқ мәзкур қанун лайиһәсиниң штатлиқ кеңәш палата әзаси франк карол тәрипидин сунулғанлиқи вә бу қанунниң сунулушиға хитай токлуқ аптомобиллириниң уйғур мәҗбурий әмгикигә четишлиқ икәнликидин ибарәт әндишиләр түрткә болғанлиқи қәйт қилинмақта.

“аризона әйники” тор гезитиниң билдүрүшичә, американиң токлуқ аптомобилларға көчүши, кишилик һоқуқ әндишилирини күчәйткән болуп, хитайға охшаш дөләтләрниң токлуқ аптомобил материяллирини ишләпчиқиришта мәҗбурий әмгәк вә балилар әмгикини ишлитиши әндишә қозғимақта икән. Хәлқарадики нопузлуқ тәтқиқат орунлириниң елан қилған бу һәқтики доклатлирида, хитай аптомобил санаитиниң дәсләпки материял ишләпчиқириш басқучида, уйғур мәҗбурий әмгикиниң кәң омумлашқанлиқи қәйт қилинип кәлгән.

“аризона әйники” ториниң билдүрүшичә, кеңәш палата әзаси франк каролниң қанун лайиһәсидә, әгәр аптомобил ишләпчиқарғучилар мәҗбурий әмгәкни ишләткәнлики һәққидә сахта яки хата учур билән тәминлисә, һәр бир хата учури үчүн 10 миң доллар җәриманә қоюлидикән яки әсли тохтамдики һөкүмәт органи төлигән пулниң йеримини төләйдикән. Қанун лайиһәсидә йәнә аптомобил ширкитиниң һәрқандақ хадими қәстән язма қәсәмнамигә хилаплиқ қилса, униңғиму һәр бир хата баяни үчүн 10 доллар җәриманә қоюлидикән. “аризона әйники” тор гезитиниң билдүрүшичә, франк карол аризона кеңәш палатасида қилған йеқинқи бир сөзидә, бу қанунниң нуқтилиқ коммунист хитайға қаритилғанлиқини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.