Чәтәлликләрниң уйғурлар дияридики мәҗбурий әмгәкни чәкләш намайишлири давам қилмақта

Мухбиримиз әзиз
2020-09-22
Share

Уйғурлар дияридики мәҗбурий әмгәк вә лагерлар мәсилиси дуня җамаитигә көпләп мәлум болуш билән биргә «21-әсирдики заманиви қуллуқ» дәп тәнқидлиниватқан бу қәбиһликни чәкләш намайишлири һәрқайси мәмликәтләрдә арқиму-арқидин оттуриға чиқишқа башлиди.

20-Сентәбир күни дуняви характердики «һалакәт исяни» тәшкилати голландийәниң амстердам шәһиридә намайиш өткүзүп, уйғурлар дияридики мәҗбурий әмгәккә хатимә беришни тәләп қилди. Намайишчилар явропадики әң чоң кийим-кечәк парчә сетиш ширкити болған C&A ширкитиниң амстердам шәһиридики дукини алдиға топлинип «уйғур қирғинчилиқи тохтисун!», «мәҗбурий әмгәк ахирлашсун!» дегән мәзмунларда хитаб қилди. Намайишни ‍уюштурғучилар бу җәрянда уйғурлар диярида милйонлиған кишиләрниң лагерларға қамилип, мәҗбурий әмгәккә селиниватқанлиқини, C&A ширкитиниң көплигән кийим-кечәклириниң мәҗбурий әмгәк арқилиқ тәйярланғанлиқини, бу хил кийим-кечәкләрни сетивелиш вә кийишниң әмәлийәттә ашу хил қәбиһликкә шерик болғанлиққа баравәр икәнлики, бу хил қәбиһликни ахирлаштурушниң тәхирсизлики қатарлиқ темилар бойичә үнлүк нутуқ сөзлиди. Шуниң билән биргә намайишчилар йәнә дуканниң әйнәклик тамлириға «уйғурларға әркинлик» дегәндәк җүмлиләрни пүркимә сир билән йезип чиқти.

Уйғурларни қоллаш мәзмунидики бу хил намайишниң йәнә бири 22-сентәбир күни канаданиң оттава шәһиридики хитай баш әлчиханиси алдида өткүзүлди. Бу намайишни тәшкиллигүчиләр шу җайдики йәһудий җамаити болуп, улар қоллирида «әмди қайтиланмайду» дегән шоар йезилған байрақларни көтүрүвалғаниди. Оттава шәһиридә олтурушлуқ бир қисим уйғурларму «шәрқий түркистан җумһурийити байриқи» ни көтүргән һалда намайишқа қатнашти.

Мәлум болушичә, әйни вақитта бу хил мәҗбурий әмгәк вә җаза лагерлириға мәһкум болушниң дәрдини көп тартқан йәһудий җамаитиниң нөвәттә ашу хил қисмәтләргә дуч келиватқан уйғурларни қоллаш намайиши көплигән дөләт вә шәһәрләрдә өткүзүлмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.