«Микрософт» тәтқиқат темилириниң хитай һөкүмитиниң уйғурларни тәқиб қилишида ишлитилгән болуши оттуриға чиқмақта

Мухбиримиз ирадә
2019-04-12
Елхәт
Пикир
Share
Принт

«Микрософт» ширкитиниң хитайдики бир университет билән бирлишип елип барған тәтқиқат темилири хитай һөкүмити тәрипидин уйғурларни назарәт вә тәқиб қилиш үчүн ишлитилгән болуши мумкинлики илгири сүрүлмәктә вә җиддий ғулғула пәйда қилмақта.

Фирансийә агентлиқиниң хәвәр қилишичә, йеқинда микрософт ширкитиниң хитай армийәсигә қарашлиқ болған хитай дөләт мудапиә университети билән аз дегәндә 3 тәтқиқат темиси үстидә һәмкарлашқанлиқи оттуриға чиққан. Бу вәқә америка ширкәтлириниң хитайдики тәқиб системисиға биваситә яки васитилик һалда шерик болуш мәсилисини йәнә бир қетим оттуриға сөрәп чиқти.

Мәлум болушичә, бу һәмкарлиқ түрлири йүз тонуш вә уни анализ қилиш шундақла компютерда грамматикилиқ тәһлил йүргүзүш арқилиқ тордики мәзмунларни чүшиниш қабилийитигә игә болуш қатарлиқ бир қанчә хил сүний идрак техникилирини өз ичигә алидикән.

Америкадики меркатор тәтқиқат институтиниң тәтқиқатчиси һелена легарда фирансийә агентлиқиға қилған сөзидә «хитайниң юқирида исми тилға елинған техникиларни уйғур районидики бастурушлири үчүн ишлитиватқан болуш еһтималлиқи интайин юқири» дегән. У йәнә бундақ юқири дәриҗилик техникиларниң хитай армийәсини техника җәһәттин заманивилаштуруш вә учурлаштурушни тезлитип, уларниң 2049-йилиғичә дунядики әң илғар армийә болуш нишаниға йетишини тезлитидиғанлиқини әскәрткән.

Микрософт ширкити бу һәқтә ахбаратларға қайтурған инкасида өзлириниң техника тәрәққияти үчүн пүтүн дунядики алимлар билән һәмкарлишидиғанлиқини билдүргән.

Хитайға ген учурини рәтләш үскүниси сетип бәргән термо фишир ширкитиниң вәқәсидин кейин көплигән америка сиясәтчилири америка техника ширкәтлириниң хитай билән орнатқан һәмкарлиқлириға қарита дөләт контроллуқини ашурушниң зөрүрлүкини тәкитләп кәлмәктә.

Уйғурларға мунасивәтлик икки қанун лайиһәсидә мана бу мәсилә алаһидә тәкитләнгән.

Пикирләр (0)
Share
Толуқ бәт