Xitay hökümiti misirda oquydighan Uyghur oqughuchilargha cheklime qoydi

Muxbirimiz erkin
2016-10-14
Share

Xitayning misirda turushluq elchixanisi yéqinda uqturush chiqirip, misirgha sayahet wizisi yaki qisqa muddetlik wiza bilen kelgen herqandaq xitay puqrasigha misirda oqushi, turushi we iqamet élishi üchün guwahname béjirip bermeydighanliqini bildürgen.

Xitay elchixanisining 11‏-öktebir chiqarghan uqturushida, bu belgilime misir tashqi ishlar ministirliqining elchixanigha tapshurghan chet'ellik oqughuchilargha wiza bérish mesilisi heqqidiki notisigha asasen chiqirilghanliqini bildürgen.

Xitay elchixanisining uqturushida körsitishiche, misir tashqi ishlar ministirliqi xitaygha peqet misirning xitayda turushluq elchixanisidin oqush wizisi alghan oqughuchilarningla misirdiki aliy mekteplerde oqushigha yol qoyulidighanliqini uqturghan.

Analizchilarning bildürüshiche, bu belgilime xitayning telipige asasen chiqirilghanmu yaki misir tashqi ishlar ministirliqi özi chiqardimu bunisi melum emesken. Emma misirdiki Uyghur oqughuchilar weziyitidin xewerler Uyghur diniy zatlarning bildürüshiche, xitayning yéqindin buyan misirda oquydighan oqughuchilarni qattiq teqib astigha alghanliqi bir ré'alliqken. Yéqinda misirgha bérip kelgen bir diniy zat, yéqinda atushtin misirgha sayahet wizisi bilen kélip, diniy oqushqa kirgen bir qanche Uyghur balini, atushtiki yerlik da'irilerning ata-anisigha bésim ishlitip mejburiy qayturup ketkenlikini bildürdi.

Analizchilarning körsitishiche, xitay hökümiti Uyghur balilarning misirgha chiqip oqushini chekligechke, ularning oqush wizisi bilen misirgha chiqishi bek müshkül bolup, shunga, ular misirgha normal sayahet wizisi bilen bérip, oqush wizisigha özgertish yolini tutup kelgen iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.