Taylandtin qéchip ötken Uyghurlardin bir kishi malayshiyada tutulup qalghan

Muxbirimiz erkin
2017-11-23
Élxet
Pikir
Share
Print

Malayshiya da'iriliri peyshenbe küni taylandning sadaw musapirlar merkizidin qéchip chiqip malayshiyagha ötüp ketken Uyghur musapirliridin bir kishini tutqanliqini élan qilghan.

Firansiye agéntliqining xewer qilishiche, malayshiyaning tayland bilen chégridash kéda shtatining saqchi bashliqi asri yusuf Uyghur musapirning sadaw chégrasigha yéqin jayda tutulghanliqini bildürgen. Asri yüsüf firansiye agéntliqigha bergen uchurida "30 Yashlardiki tutqun malayshiya-tayland chégrasigha yéqin bukét tangga dégen yerge méngip kirgen.... Uning ehwali yaxshi, biz uni taylandqa qayturushqa hepilishiwatimiz," dégen.

Taylandning malayshiyagha chégridash sadaw baziridiki tutup turush merkizide 2-3 yildin béri tutup turuluwatqan Uyghurlardin 20 kishi 20‏-noyabir tang seherde qachqan idi. Tayland saqchi da'iriliri seyshenbe küni Uyghur musapirliridin 5 kishining tutulghanliqi, lékin 15 kishining malayshiya terepke ötüp ketkenlikini bildürgen.

Uyghur teshkilatliri malayshiya da'irilirining chégradin ötken Uyghurlarni tayland yaki xitaygha qayturmasliqini, ulargha siyasiy panahliq tilesh pursiti yaritip bérishni telep qilip, xelq'ara jem'iyetni ulargha yardem bérishke chaqirghan idi. Tayland hökümiti 2013‏-we2014‏-yilliri xitayning siyasiy bésmidin qéchip tayland arqiliq türkiyege mangghan nurghun Uyghur musapirlirini tutqun qilghan. Ularning bir qismining türkiyege kétishige yol qoyghan bolsimu, biraq yene bir qismini xitaygha ötküzüp bérip, b d t musapirlar mehkimisi we kishilik hoquq teshkilatlirining tenqidige uchrighan. Tayland b d t musapirlar ehdinamisige xilapliq qilish bilen eyiblen'gen idi.

Malayshiya saqchi bashliqi asri yusufing firansiye agéntliqigha bildürüshiche, peyshenbe küni tutulup qalghan Uyghur musapirni yerlik bir bir kishi saqchigha melum qilip qoyghan. Asri yusuf, saqchi terepning chégra boyida közitishni kücheytkenliki we kocha-koylargha qachqunlarning resimini tarqatqanliqini bildürgen.

Toluq bet