Oqughuchi mutellip imin xelq'arani Uyghur oqughuchilirining ehwaligha diqqet qilishqa chaqirdi

15-Iyul seherde türkiyege qaytish sepiride, béyjing ayrodromida xitay saqchiliri teripidin tutup kétilip, 79 kündin kéyin ürümchidiki melum méhmanxanigha solinip soraq qilin'ghanliqi ashkarilan'ghan istanbul uniwérsitétining magistir aspiranti mutellip imin, 5-noyabir küni Uyghur biz torida 3-parche ochuq xétini élan qildi.

Mutellip imin xétide özining nöwette xotendiki a'iliside dawamliq nezerbendte yashawatqanliqini bildürüp, xelq'ara jem'iyettin chet'elde oquwatqan Uyghur oqughuchilarning xitayda uchrawatqan kishilik hoquq depsendichiliki mesilisige diqqet qilishni muraji'et qildi.

Mutellip imin özining 79 künlük tutqundin kéyinmu dawamliq a'iliside nezerbendte turuwatqanliqini, saqchi da'iriliri uning pasporti we kimlikini tartiwalghanliqi üchün türkiyege qaytip oqushini dawamlashturushqa amalsiz qalghanliqini bayan qilip, jem'iyettiki her sahe kishiliridin yardem telep qilghandin bashqa, özining bu xetni yézishtiki meqsiti heqqide toxtilip “Men bu ochuq xetni élan qilish arqiliq peqetla özümning qanunda belgilen'gen kishilik hoququmni qoghdashnila meqset qilmidim, belki jem'iyettiki her sahe kishilerni chet'ellerde oquwatqan Uyghur oqughuchilar topining ehwaligha köngül bölüshke chaqirmaqchimen. Chünki nöwette, chet'elde oquwatqan Uyghur oqughuchilar yurtigha qaytip uruq-tughqanlirini körüshni arzu qilsimu, emma dölet amanliqini qoghdash saqchilirining soraq qilishigha duch kélidighan qismettin qorqqini üchün yurtigha qaytalmaywatidu” dégen jümililerni yazghan.