Уйғур елидә хизмәт қилған NBA тиринерлири мәшиқ базилирида яш топчиларниң қаттиқ хорлинидиғанлиқини ашкарилиған

Мухбиримиз ирадә
2020-07-30
Елхәт
Пикир
Share
Принт

ESPN Ниң исмини ашкарилашни халимиған мәнбәләрни нәқил кәлтүрүп хәвәр қилишичә, америка васкетбол бирләшмиси NBA ниң уйғур ели вә башқа җайлардики мәшиқ базилирида хизмәт қилған америкалиқ теринерлар мәшиқ базисида тәрбийәлиниватқан яш топчиларни йәрлик теринерларниң қаттиқ хорлайдиғанлиқидин шикайәт қилған.

Хәәвәрдә ейтилишичә, NBA ниң уйғур елиниму өз ичигә алған 3 мәшиқ базисида ишлигән бир қанчилиған исмини ашкарилашни халимайдиған америкалиқ теринерлар ESPN телевизийисигә у йәрдики хитай тиренерларниң яш топчиларни урудиғанлиқини, уларға мувапиқ дәрсму бәрмәйдиғанлиқини ашкарилиған. Балиларға маарип тәрбийәси берилмәслики вә уларниң җисманий һуҗумға учриши бир қисим теринерларниң тохтамдин бурун ишини ташлап кетишигә сәвәб болған болуп, улар өзлириниң яш топчилар учраватқан бу муамилигә қарап туралмиғанлиқини ейтқан.

Уйғур елидә хизмәт қилған америкалиқ теринерлар болса өзлириниң 10 ай ичидә сақчиларниң тәһдити вә тәқибигә учриғанлиқини, һәтта чәтәллик болғанлиқи үчүн өй иҗаригә елишниңму қейинға тохтиғанлиқини ейтип бәргән. Теринерлардин бири өзиниң үч қетим тохтитип сораққа тартилғанлиқини, бир қетим бир нәччә саәт тутуп турулғанлиқини билдүргән вә уйғур елиниң вәзийитини «иккинчи дуня урушидики германийә» дәп тәсвирлигән.

Мәзкур хәвәр елан қилинғандин кейин зор ғулғула қозғиди. NBA Ниң хәлқарадики һәрикәтлирини назарәт қилидиған муавин башлиқи марк татум бу һәқтики соалларға җаваб қайтурғанда өзлириниң һәқиқәтән оқуғучи яш топчиларниң хорланғанлиқи тоғрисида «әрз-шикайәт» ләрни тапшурувалғанлиқини вә дәрһал бу әһвални хитай даирилиригә хәвәр қилғанлиқини билдүргән. Бирақ у NBA теринерлириниң уйғур районида тәкшүрүлүши вә тутуп турулушиға аит әһваллардин хәвири болмиғанлиқини ейтқан.

Ройтерс агентлиқиниң бу һәқтики хәвиридә ейтилишичә, хитай тәнтәрбийә комитети бу һәқтики соалларға җаваб қайтурмиған. Хитай ташқи ишлар министирлиқиниң баянатчиси өзиниң ESPN хәвиридә чиққан бу ишларни дипломатик мәсилә, дәп қаримайдиғанлиқини ейтип, соалға җаваб бәрмигән.

Америка дөләтлик васкетбол кулуби NBA ниң үрүмчидики мәшиқ мәркизи 2016‏-йили 10‏-айда қурулған болуп, у хитайдики 3 мәшиқ мәркизиниң бири болуп һесаблинидикән. Уйғур елидики мәшиқ мәркизи қурулғандин буян изчил һалда кишилик һоқуқ органлири вә америкалиқ бир қисим сиясәтчиләрниң тәнқидигә учрап кәлгән. Йеқинда NBA уйғур елидики мәшиқ базиси билән алақисини үзгәнликини җакарлиған иди.

NBA Узундин бери еғир кишилик һоқуқ кризиси йүз бериватқан вә 3 милйон әтрапида киши лагерға қамалған уйғур районида мәшиқ базиси ачқанлиқи вә бу зулумға сүкүт қилғанлиқи сәвәблик америкалиқ сиясәтчиләр вә шундақла кишилик һоқуқ актиплириниң күчлүк тәнқидигә учриған иди.


Толуқ бәт