Олимпик комитети мусабиқә формилирини тикиш үчүн уйғурларниң мәҗбурий әмгикигә четишлиқ хитай ширкәтлири билән тохтамлашқан

Мухбиримиз ирадә
2021-04-08
Share

Хәлқара олимпик комитети токйо 2021-йиллиқ язлиқ олимпик тәнһәрикәт мусабиқиси вә бейҗиң 2022-йиллиқ қишлиқ олимпик тәнһәрикәт мусабиқисида кийилидиған рәсмий формларни тикиш үчүн тохтам түзгән хитай тоқумичилиқ шеркитиниң уйғур елида тармақ завути болған, йәнә келип униң мәҗбурий әмгәк мәһсулати икәнлики ениқ бекитилгән уйғур ели пахтилирини ишлитишни очуқ-ашкара тәшвиқ қилған ширкәт икәнлики айдиңлашти.

Хәлқара олимпик комитети 2019-йили 9-айда хитайниң хенйүәншяң (HYX) гурупписи билән хәлқара олимпик комитети әзалири вә хизмәтчилирини мурасимда ишлитилидиған рәсмий форма билән тәминләш һәққидә тохтамлашқанлиқини елан қилған иди.

Америкадики "аксюс" (Axios) гезитиниң хәвәр қилишичә, мәзкур ширкәтләр гуруһиниң хитай олимпик комитети билән узун йиллиқ мунасивити бар болуп, у 2008-йиллиқ бейҗиң олимпик тәнһәрикәт мусабиқисиниң қоллиғучиси болған. Хитайниң тавбав қатарлиқ тор тиҗарәт супилирида бу ширкәт уйғур елидин чиққан пахтилар билән ясалған мәһсулатларни елан қилған икән. Ширкәт тор бетидә йәнә уларниң завутлиридин бириниң уйғур елигә җайлашқанлиқи йезилған икән.

Мәзкур хәвәр елан қилинғандин кейин иҗтимаий таратқуларда зор инкас қозғиди. Американиң сабиқ ташқий ишлар министири майк помпийо тивиттерда буниңға инкас қайтуруп: "америкалиқларни ирқий қирғинчилиқ қиливатқан хитайдики қуллар ясиған олимпик формлирини кийишкә мәҗбурлаш интайин еғир бир әһвал," дәп язған иди.

Америкадики әмгәк һоқуқи гурупписи тәтқиқат мәркизиниң дериктори пенелоп киритис "Axios" гезитигә қилған сөзидә "олимпик тәнһәрикәт мусабиқисиниң уйғур районида ишләпчиқириш елип баридиған, һәтта буниң билән махтинидиған ширкәтләр билән мунасивити болмаслиқи керәк. Бу әйиблиниши керәк," дегән. У йәнә "дуня уйғур районида йолға қоюлуватқан дәһшәтләрни тонуватқан бир пәйттә, хәлқара олимпик комитети қариғу болуп қалғандәк қилиду," дегән.

Һалбуки, хәлқара олимпик комитетиниң баянатчиси "Axios" ға қайтурған җавабида юқириқи хитай горуһини хәлқара олимпик комитетиға олимпик формиси ишләпчиқиришта ишлитилидиған пахтиниң мәнбәсиниң чәт әлдин киргүзүлгәнлики һәққидә испат билән тәминлиди, дегән. Бирақ улар бу гуваһнаминиң ким тәрипидин тәминләнгәнлики һәққидә ениқ мәлумат бәрмигән, гуваһнаминиму көрсәтмигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт