2022-Yilliq béyjing qishliq olimpikini bayqut qilish xelq'ara herkitining ikki ezasi afénada tutqun qilin'ghan

Muxbirimiz erkin
2021-10-18
Share

Xelq'ara olimpik komitéti olimpik mesh'ilini xitaygha ötküzüp bérish harpisida, grétsiye paytexti aféna shehiridiki olimpik téghi-akropolista namayish ötküzüp, xelq'ara olimpik komitétining "‍Ikki yüzlimichiliki" ge naraziliq bildürgen bir xongkongluq pa'aliyetchi bilen bir tibet pa'aliyetchi tutqun qilin'ghan.

Roytérs agéntliqining xewer qilishiche, biri 18, yene birsi 22 yashliq amérika grazhdani bolghan bu ikki pa'aliyetchi akropolista tibet we xongkong bayraqlirini chiqirip, "2022-Yilliq béyjing qishliq olimpikini bayqut qilayli", "Erkinlik bolmisa, musabiqimu yoq" dégen shu'arlarni towlighan.

Meydan'gha yétip kelgen grétsiyelik saqchilar pa'aliyetchilerning bayraqlirini tartiwélip özlirini tutup ketken, biraq "Jenubiy xitay etigenlik pochtisi" gézitining xewer qilishiche, tutqunlar 18-öktebir küni qoyup bérilgen. Xelq'ara olimpik komitéti 19-öktebir küni olimpik téghidiki akropolis qedimiy shaher xarabiside murasim ötküzüp, olimpik mesh'ilini béyjing qishliq olimpik da'irilirigha ‍ötküzüp béridiken.

‍Olimpik mesh'ilini yéqish murasimi xitayning Uyghurlargha yürgüzgen siyasiti "Irqiy qirghinchiliqi" we "Insanliqqa qarshi jinayet" dep eyiblinip, béyjing qishliq olimpikini bashqa döletke yötkesh yaki bayqut qilish chaqiriqi ewj alghan bir waqitta ötküzülgen. Biraq xelq'ara olimpik komitéti bu chaqiriqlarni ret qilghan.

Melum bolushiche, mesh'el yéqish murasimi ötküzülidighan 19-öktebir küni Uyghur, tibet, xongkong teshkilatliri we bashqa kishilik hoquq organliri afénada axbarat yighini ötküzüp, olimpik mesh'élining xitaygha ötküzüp bérilishini we xelq'ara olimpik komitétining "Ikki yüzlimichiliki" ni eyibleydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet