Шинҗаң гезитиниң сабиқ партком секретари пара елиш җинайити билән 7 йиллиқ кесилгән

Мухбиримиз җүмә
2016-07-06
Share

Шинҗаң гезитиниң сабиқ партком секретари, баш муһәррири җав шинвей пара елиш җинайити билән 7 йиллиқ қамақ җазасиға һөкүм қилинған.

Хитай ахбаратлирида 6-июл елан қилған хәвәрләргә қариғанда, җав илгири-ахири болуп 1 милйон 920 миң сомдин артуқ пара алған. Үрүмчи оттура соти йеқинда ачқан сотта униңға 7 йиллиқ қамақ җазаси бәргәндин башқа йәнә 40 миң сом җәриманә қойған.

Бу йил 59 яшқа киргән җав шинвей шинҗаң гезитиниң муавин идарә башлиқлиқ вәзиписиниму өтигән болуп, у 2015-йили 6-авғуст пара елиш җинайити билән җинайи ишлар бойичә тохтитип қоюлған вә шу йили ноябирда партийәдин қоғлап чиқирилған икән.

Хитайдин чиқидиған чирикликкә қарши туруш учурлири торида көрситишичә, җав шинвей әсли хитайниң шәнши өлкисидә туғулған болуп, 1986 йилидин башлап қәшқәрдә һоқуқ тутушқа башлиған.

У 1986-йилидин 1996-йилиғичә қәшқәр вилайәтлик партком ишханисиниң катипи болған. У шундин кейин тәдриҗий өсүп, қәшқәр вилайәтлик парткомиға баш катип, конашәһәр наһийәсигә партком секретари, қәшқәр вилайәтлик парткоминиң һәйәт әзаси вә қәшқәр вилайәтлик тәшвиқат бөлүмигә башлиқ болған.

Җав шинвей 2011-йили шинҗаң гезитиниң партком секретари қилип йөткәлгән.

Хәвәргә қариғанда, у 2005-йилидин 2015-йилиғичә болған 10 йил ичидә һоқуқидин пайдилинип йегән омумий пара соммиси 2 милйон сомға йеқинлашқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт