Қазақ язғучи вә журналист дилшат оралбайниң лагерға елип кетилгәнлики илгири сүрүлди

Мухбиримиз әркин
2019-11-20
Елхәт
Пикир
Share
Принт

Қазақ язғучи, журналист вә тәрҗиман дилшат оралбайниң-2018йили тутқун қилинип, лагерға елип кетилгәнлики илгири сүрүлди.

Дилшат оралбайниң қазақистанда турушлуқ сиңлиси гүлайшаниң радиомизға билдүрүшичә, у дилшат оралбай 2018‏-йили тутқун қилинип лагерға елип кетилгәндин бери униң һечқандақ из-дерикини алалмиған. Дилшат оралбай 1987‏-йили алий мәктәпни пүттүргәндин кейин «или гезити», или областлиқ сиясий кеңәш, «күйтун гезити» қатарлиқ җайларда мухбир, тәрҗиман вә әдәбий тәһрир болуп ишлигән. Бу җәрянда у «капитан гтантиниң қизлири» қатарлиқ 15 китаб, «әркинлик» қатарлиқ 30 парчә повест вә һекайә, 150 тәк телевизийә тиятирини қазақчиға тәрҗимә қилған. Униң сиңлисиниң билдүрүшичә, дилшат оралбайниң он нәччә парчә мақалиси илгири уйғур аптоном районлуқ һөкүмәтниң мукапатиға еришкән икән. Гүлайша 19‏-ноябир күни радиийомизға бәргән учурида, дилшат оралбайниң 2008‏-йили пенсийәгә чиқип, қазақистанға көчүп чиққанлиқини, униң қазақистанда пластик деризә завути қуруп тиҗарәткә киришкәнликини билдүргән.

Униң қәйт қилишичә, дилшат оралбай 2016‏-йили қазақистанда яшайдиған хитай гиражданлириниң қайтип келиш һәққидики чақириқиға әгишип, уйғур райониға қайтип кәлгән. Лекин у қайтип келишигә даириләр униң паспортини тартивалған. Гулайша, 2018‏-йили дилшат оралбай билән йәнә бир чоң акиси вә икки сиңлисиниң тутқун қилинип, лагерға елип кетилгәнлики, гәрчә чоң акиси қоюп берилгән болсиму, лекин дилшат оралбай билән икки сиңлисиниң һазирғичә из-дерики йоқлуқини билдүргән.

Хитай һөкүмитиниң 2017‏-йили 2‏-айда башланған кәң көләмлик тутқунида 2 милйондәк уйғур вә қазақ лагерға елип кетилгән. Бәзи тутқунлар лагерларда сотлинип, қамақ җазалириға һөкүм қилинғаниди.

Пикирләр (0)
Share
Толуқ бәт