Хитай даирилири қазақистанлиқ ахбаратчилар өмикини қәшқәрдә зиярәткә орунлаштурған

Вашингтондин мухбиримиз ирадә тәйярлиди
2023.07.06

Хитай һөкүмити уйғур елида йүргүзүватқан ирқий қирғинчилиқи вә инсанийәткә қарши җинайәтлирини йошурушни мәқсәт қилған тәшвиқат һәрикәтлирини давамлаштуруватқанлиқи мәлум. “хитай хәвәрләр тори” тарқатқан бир хәвәрдин қариғанда, хитай даирилири йеқинда қазақистанлиқ ахбаратчилардин тәркиб тапқан бир ахбарат вәкилләр өмикини уйғур елигә тәклип қилған. Улар 28-июндин 4-июл күнигичә қәшқәр вилайитидә зиярәттә болған.

“хитай хәвәрләр тори” бу һәқтики хәвиридә, қазақистандин кәлгән мухбирларниң “қәшқәрдики қәдимки имарәтләр, көз қамаштуридиған қол һүнәр-сәнәт буюмлири вә һәр хил йәрлик назу-немәтләргә һәйран қелишқанлиқини; қәшқәр хәлқиниң бәхтлик турмуш кәчүрүватқанлиқини чоңқур һес қилғанлиқи” ни баян қилған.

“хитай хәвәрләр тори” тарқатқан бу хәвәрдә, қазақистандин кәлгән мухбирларниң “қәшқәрдә қәдимий бинакарлиқ өрнәклири, қол-һүнәрвәнчилик, ғәйрий маддий мәдәнийәт ядикарлиқлири интайин яхши қоғдилипту, мән буни дөлитимиздики тамашибинларға аңлитип, уларға қәшқәрниң өзгичә җәлп қилиш күчини тонуштуримән” дегәнлики илгири сүрүлгән.

Хитай һөкүмити уйғур елида 2017-йилидин башлап кәң көләмлик тутқун вә лагер түзүмини йолға қоюп, хәлқарада күчлүк тәнқидкә дуч кәлгән иди. Буниң нәтиҗисидә хитай мушу хилдики тәшвиқат характерлик зиярәт паалийәтлирини орунлаштуруп, дуняни алдашқа башлиған иди. Һалбуки, хитайниң бундақ сахта тәшвиқат һәрикәтлири, демократик дуняни алдиялмайла қалмастин, бәлки хәлқара җәмийәтниң техиму күчлүк әйибләшлиригә учримақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.