Бу йил «қош тиллиқ йәслиләр» намидики хитай тили маарипи үчүн 44 миң оқутқучи қобул қилинған

Мухбиримиз үмидвар
2017-11-26
Елхәт
Пикир
Share
Принт

Хитай даирилири бу йил уйғур дияридики «қош тиллиқ йәсли» маарипини күчәйтиш мәқситидә 4 миң 387 қош тиллиқ йәсли қурулушини ишқа ашуруш билән биргә йәнә зор санда оқутқучи қобул қилған болуп, асаслиқ қош тиллиқ йәсли маарип нишани уйғур дияриниң җәнубиға қаритилған.

Шинхуа ториниң хәвиридин мәлум болушичә, бу йил уйғур дияридики «қош тиллиқ», йәни әмәлийәттики хитай тиллиқ йәсли маарипи саһәси үчүнла 44 миң 500 нәпәр оқутқучи толуқланған болуп, һазир бу саһәдики оқутқучилар 70 миңға йәткүзүлгән. Йеза «қош тиллиқ йәслилири» дә оқуватқан оқуғучилар сани бир милйон 112миңдин ашурулған.

Илгири қош тиллиқ йәслиләр үчүн бир түмәндин артуқ оқутқучи қобул қилинидиғанлиқиға аит хәвәрләрму оттуриға чиққан иди. Әмәлийәттә, қош тиллиқ йәслиләр үчүн бу йил 44 миң оқутқучи толуқланғанлиқи ашкариланди. Гәрчә, хитай маарип даирилири бу 44 миң оқутқучиниң милләт нисбити һәққидә ениқ учур тарқатмиған болсиму, әмма хитайниң уйғур дияридики қош тиллиқ йәслиләр әһвалидин хәвәрдар уйғур зиялийлириниң ейтишичә, йеңидин толуқланған бу оқутқучиларниң мутләқ көп қисминиң хитайлар, болупму, ичкири хитай өлкилиридин қобул қилинған болуши һәмдә улар юқири мааш вә башқа нәпиқиләрдин бәһримән қилиниши мумкин икән. Чүнки, бу йилниң ичидә уйғур дияридики мәктәпләрдә уйғурчә вә қазақчә тилларни қоллиниш чәклимигә учриғанлиқи ашкариланған болуп, йәслиләрдики хитай тили оқутуш техиму күчәйтилгән, һәтта йезиларға муқимлиқ хизмитигә әвәтилгән кадирларниңму йеза йәслилиридә уйғур пәрзәнтлиригә хитай тили дәрси өтүватқанлиқи, йеза-қишлақлардики деһқанлар арисида мәҗбурилиқ түси алған хитай тили өгитиш хизмити билән мәшғул болуватқанлиқи мәлум.

Пикирләр (0)
Share
Толуқ бәт