Хитай җасуслуқ органлириниң RFA картонисти ребел пепирға тузақ қурғанлиқи ашкариланди

Вашингтондин мухбиримиз әркин тәйярлиди
2024.05.13

Хитай җасуслуқ органлириниң йеқинда әркин асия радийоси (RFA) ниң картонисти, журналист ребел пепир (Rebel Pepper) ға тузақ қуруп уни камбоджаға алдап апармақчи һәмдә шу җайда тутқун қилмақчи болғанлиқи ашкариланди. Австралийә ABC қанилиниң “төт булуң” пирограммиси елан қилған бу һәқтики тәкшүрүш пирограммисида көрситилишичә,  камбоджадики бир ширкәтниң хадимлири сияқиға киривалған хитай җасуслириниң тутқун пилани ребел пепирниң камбоджаға бериштин баш тартиши сәвәблик ишқа ашмиған.

 “ребел пепир” (“исянкар муч”) тәхәллусидики ваң лимиң йиллардин буян хитай рәиси ши җинпиңни өз ичигә алған хитай әмәлдарлири вә хитайдики кишилик һоқуқ дәпсәндичиликлиригә аит сияси картонларни сизип даң чиқарған. Шундақла өзгичә тәсәввур иқтидарини җари қилдуруп өзи туғулуп чоң болған уйғур дияридики бастуруш, лагерлар, мәҗбурий әмгәк, сиясий меңә ююш һәрикәтлири һәққидиму чоңқур мәнигә игә көплигән сиясий картонларни сизип, уйғурларниң ечинишлиқ вәзийитини әкс әттүргәниди. Униң хитай вәзийитини, җүмлидин уйғурларниң күлпәтлирини тәсвирләштики өзгичә сиясий картончилиқ таланти уни хитай һөкүмитиниң “дүшмини” гә айландуруп, хитай җасуслуқ органлириниң чегра һалқиған бастурушиниң нишани қилғанлиқи қәйт қилинмақта. Ребел пепирниң “төт булуң” пирограммисида қәйт қилишичә, елхәт арқилиқ униңға өзини камбоджадики бир ширкәтниң мәсул хадими,дәп тонуштурған бирси униңдин мәлум һәқ бәдилигә ширкәтниң елан-сәнити үчүн картон сизип беришни өтүнгән.

 Ребел пепир бу ширкәткә картон сизип берип бир мәзгил өткәндин кейин бу шәхс униң билән қайта алақиләшкән. Бу қетим у ребел пепирға камбоджаға келип ширкәттә юқири мааш билән ишләш тәклипини сунған. Ребел пепир камбоджаға беришни халиған болсиму, әмма аялиниң тосуши билән бериштин ваз кәчкән. ABC Ниң тәкшүрүшидин мәлум болушичә, ребел пепир билән алақиләшкән камбоджадики шәхс әмәлийәттә хитай дөләт бихәтәрлик министирлиқиниң җасуси икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.