Сахта пулларни бир тәрәп қилиш һәрикити лопнур наһийисидиму елип берилмақта

Хитайда сахта пулларни йиғивилип, сахта пул басқанларға зәрбә бериш һәрикити кучәтилгән болуп, бу хил һәрикәт уйғур дияриниң һәр қайси җайлиридиму елип берилмақта. Болупму, бир қисим адәм көп келидиған саяһәт орунлирида сахта хәлқ пулини һәқиқий хәлқ пулидин пәрқләндүрүш, хәлқ пулиниң қурулмисини чүшиниш җәһәттә тәшвиқатлар елип берилған.

Тәңри тағ ториниң хәвәр қилишичә, уйғур дияриниң байинғулин моңғул аптоном области тәвәсидики лопнур наһийилик һөкүмәт саяһәт идариси қатарлиқ орунлар билән хитай хәлқ банкисиниң лопнур тармиқи бирлишип, лопнурлуқлар саяһәт кәнтидә сахта пулларға зәрбә бериш нуқтиси қурған.

Хитай учур ториниң хәвәр қилишичә, мундақ сахта хәлқ пулиға зәрбә бериш һәрикити ичкири өлкиләрдиму чиң тутиливатқан хизмәтләрниң бири болуп, гуаңдоң өлкилик җамаәт хәвпсизлики назарити йеқинда өз тәвәликидики икки җайдики сахта пул ясаш увисидин бәшни битчит қилип, 11 милйон йүәндин артуқ сахта пул вә сахта пул бесиш мәтбәә қәғизи, мәтбәә машиниси қатарлиқларни қолға чүшүргән. Бу йилниң бешида җяңши өлкисидә сақчилар 70 милйон йүәндин артуқ йерим пишшиқлап ишләнгән сахта пулни қолға чүшүргән иди.