Дуня уйғур қурултийи қазақистан сотиниң сайрагүл савутбай һәққидики һөкүмини тәбриклиди

Мухбиримиз шөһрәт һошур
2018-08-01
Share

Дуня уйғур қурултийи бүгүн, йәни 1‏-авғуст күни баянат елан қилип, қазақистан сотиниң уйғур районидин қечип кәлгән сайрагүл савутбайни хитайға қайтурмаслиқ һәққидә чиқарған һөкүмини тәбриклиди.

Баянатта қазақистанниң бу нөвәт һәқ вә адаләтни яқлиғанлиқиға апирин оқуған дуня уйғур қурултийи қазақистанниң сайрагүлниң кәчмиши вә униң қолидики пакитларға асасән хитайниң уйғур районида йүргүзүватқан зораванлиқлирини тонуп йетишини үмид қилидиғанлиқини билдүрди. Йеқинқи 10 йил ичидә қазақистан, пакистан, тайланд қатарлиқ дөләтләрдин 300 гә йеқин уйғурниң хитайға мәҗбурий қайтуруветилгәнлики әслитилгән баянатта нөвәттә сиясий панаһлиқ сәпиридә оңушсизлиққа учриған уйғурлардин малайшияниң қолида 11 киши, булғарийәниң қолида 5 киши барлиқи, буларғиму хитайниң қол созуп туруватқанлиқи тәкитләнгән. Баянатта йәнә хитайниң қол созуши билән чеградин чиқирилиш хәвпигә дуч келиватқан уйғур тутқунларниң тәқдири бу дөләтләрниң сотчилириниң һөкүмигә бағлиқ болуп туруватқанлиқи, бу дөләтләрниң қазақистанни үлгә елиши керәклики ишарәт қилинди.

Баянатниң ахирида дуня уйғур қурултийи қазақистанни хитайниң уйғур диярида йүргүзүватқан инсанлиққа қарши җинайәтлиригә сүкүт қилмаслиққа, сайрагүл савутбай делосида көрсәткән адалитини уйғур дияридин кәлгән башқа сиясий панаһланғучилар үчүнму давамлиқ көрситишкә чақириқ қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.