Шаңхәй хәлқара айродромини партлатқан гумандар 8 йиллиқ қамақ җазасиға һөкүм қилинди

Мухбиримиз әркин
2017-02-17
Share

Хитайниң шаңхәй шәһиридики бир сот мәһкимиси җүмә күни һөкүм елан қилип, 2016‏-йили шаңхәй пудуң хәлқара айродромиға қолда ясалған бомба қоюп партлатқан гумандарни 8 йиллиқ қамақ җазасиға һөкүм қилған. 2016‏-Йили 12‏-июнда йүз бәргән партлаш вәқәсидә 3 адәм яриланған иди.

Сақчилар бомбини 29 яшлиқ җу шиңбәйниң партлатқанлиқини, бомбиниң пива ботулкисиға салиут дориси қачилап ясалғанлиқини елан қилған. Әйни чағда җу шиңбәй айродромдики аммиға қаритип 3 ботулкилиқ бомба атқан. Әмма бомбидин иккиси партлап, бири партлимиған.

Фирансийә агентлиқиниң җүмә күни хәвәр қилишичә, мәһкимә җу шибәйниң илгири шәхси турмуш вә вә муһәббәт мәсилисидә бәзи зиддийәтләргә петип қалғанлиқини илгири сүргән.

Бәзи көзәткүчиләрниң қәйт қилишичә, җу шиңбәйниң 8 йиллиқ қамақ җазасиға һөкүм қилиниши, хитай қануниниң пәрқлиқ районларда, пәрқлиқ иҗра қилинидиғанлиқиниң типик мисаликән. Уйғур районида бомба ясап партлитиш вәқәлириниң һәммиси "террорлуқ" җинайитигә кириду.

Бу хил җинайәт билән әйибләнгән гумандарларға еғирлаштуруп җаза берилип кәлгән. Уйғур кишилик һоқуқ паалийәтчилириниң қәйт қилишичә, бу хил җинайәт садир қилған уйғур гумандарлар өлүм җазаси яки муддәтсиз қамақ җазалириға һөкүм қилинидикән.

Фирансийә агентлиқиниң билдүрүшичә, сот мәһкимиси җу шиңбәйниң шәхси турмуш мәсилиси барлиқини илгири сүргән болсиму, әмма униң роһий кесили барлиқиға даир һечқандақ бир дәлил тепилмиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт