Kéngesh palata ezasi xawléyning shi jinpingni jawabkarliqqa tartish qanun layihesi xitayning qattiq inkasini qozghighan

Amérika jumhuriyetchi kéngesh palata ezasi josh xawléyning ‍ötken hepte otturigha qoyghan Uyghur irqiy qirghinchiliqida xitay rehbiri shi jinpingni jawabkarliqqa tartish qanun layihesi, xitayning diplomatik qa'ide-yosunlardin halqighan qattiq inkasini qozghighan.

“Oksi'os” torining xewer qilishiche, josh xowléyning ötken hepte sun'ghan qanun layiheside, Uyghurlargha yürgüzülgen irqiy qirghinchiliqta shi jinping we uning yuqiri derijilik emeldarlirining biwasite jawabkarliqi barliqini mu'eyyenleshtürüsh tekitlen'gen.

Xitayning amérikada turushluq elchixanisi kéngesh palata ezasi xawléygha élxet yézip, uning sun'ghan shi jinpinggha émbargo yürgüzüsh heqqidiki qanun layihesini eyibligen.

Josh xawléyning qanun layihesi xitay kompartiyesining ötken yekshenbe küni axirlashqan 20-qurultiyida shi jinping qa'idini buzup, 3-nöwet xitay kompartiyesining bash sékrétarliqigha békitilgen, shundaqla uninggha sadiq kishilerdin yéngi siyasiy byuro da'imiy komitéti teshkilligen bir waqitta sunulghanidi.

“Oksi'os” ning xewiride éytilishiche, xitay elchixanisining 24-öktebir yollighan 800 sözlük xétide, mezkur qanun layihesi ghezep bilen “Tekebburluq we peskeshlik” dep eyiblen'gen.

Xewerde, xitay elchixanisining xéti uning amérikaning émbargosigha qanchilik sezgür ikenlikini namayan qilghanliqi, shundaqla bu qanun layihesi eger kéler aydiki ottura mezgillik saylamda jumhuriyetchiler dölet mejlisini kontrol qilsa, amérika-xitay otturisida yéngi jiddiychilikning shepisini béridighanliqi tekitlen'gen.

“‍Oksi'os” ning bildürüshiche, xitay elchixanisi xétide, josh xawléyning xitaygha qarshi soghuq urushi tepekkuri we idé'ologiyelik bir tereplimiliktin waz kéchip, xitay kompartiyesi we hökümitining “Shinjang siyasitige toghra qarishi”, bu qanunni toxtitishi, xitay kompartiyesi we xitay rehberlirige hujum qilishni toxtitishini telep qilghan.