Uyghur diyarida “Shi jinpingning sözini öginish dolquni” kötürüldi

Muxbirimiz eziz
2022.07.19
Share on WhatsApp
Share on WhatsApp

Xitay re'isi shi jinpingning 13-iyulda Uyghur diyarida ziyarette bolushidin kéyin Uyghur diyarining herqaysi sheher we nahiyeliridin tartip yéza-qishlaqlirighiche hemmila jayda tushmutushtin “Re'is shi jinpingning sözini yaxshi öginip parlaq kelgüsi yaritish” zor dolquni kötürülgen.

Xitay hökümti'i bashqurushidiki “Xitay xewerliri” torining 19-iyuldiki xewiride éytilishiche, kelpin nahiyesining gezlik yézisidiki “Üch el” (el rayini bilish, elge nep yetküzüsh, elni mayil qilish) xizmitige chüshken kadirlar shu jaydiki kadirlar we déhqanlarni yéza merkizige toplap, shi jinping heqqidiki téléwiziye xewerlirini qoyup bergen. Yopurgha nahiyesidiki pa'aliyette herqaysi ahaliler komitétining kadirliri öz tewelikidiki kishilerni “Ülgilik a'ile” lerge toplap shi jinpingning ziyariti heqqidiki teshwiqat filimlirini körgen. Bu xil pa'aliyetlerge qatnashqan kishilerdin qeshqer yéngisheher nahiyesining baghche yézisidiki déhqanlardin buxelchem tursun “Bash sékrétarning addiy puqralarning öylirige kirip ehwal sorighanliqini körüp bek tesirlendim. Shinjangdiki her millet xelqining jungxu'a büyük a'ilisining bir ezasi ikenlikidin pexirlendim” dégen.

Bu xildiki yüzligen ammini zallargha toplap öy we shxanilargha qeder omumlashturulghan shi jinpingning ziyariti we uning sözligen sözliri heqqidiki tesirat sözlesh pa'aliyetlirde “Üch el” kadirliri asasliq teshkilligüchiler bolghan. Bu jeryanda nuqtiliq halda shi jinpingning “Jungxu'a ortaq kimliki chüshenchisini chongqurlashturush”, “Asasiy qatlam partiye teshkilatlirining jenggiwar rolini jari qildurush”, “Shinjangni medeniyet arqiliq sughirish” dégendek bir qatar mezmunlar qaytidin merkiziy témilar qatarida öginish bilen birge shi jinpingning “Aliy dahiy” liq nopuzi yene bir qétim küchlük teshwiq qilin'ghan.

Xitay hökümitining bu xildiki “Medeniyet zor inqilabi” uslubida siyasiy teshwiqatni kéngeytishi heqqide Uyghurshunas alimlardin proféssor jéymis milward (James Millward) özining tiwéttér bétide mexsus sehipe ajritip “Shi jinpingning bu qétimqi ziyaret jeryanida sözlirining merkiziy idiyesi bizge ‛shinjangdiki hemme millet xitay millitidur, ular jezmen xitay bolup tereqqiy qilish kérek‚ dégen bir uchurni yollaydu” dep yazghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.