Хитай дөләт рәиси ши җинпиңниң ласада туюқсиз зиярәттә болғанлиқи ашкариланған

Радийомизниң игилиши вә бир қанчә мәнбәләрдин дәлиллишичә, хитай дөләт рәиси ши җинпиң бүгүн, йәни 2021-йили 7-айниң 22-күни тибәтниң мәркизи ласада туюқсиз зиярәттә болған.

Дәрвәқә, бу зиярәттин бир күн авал даириләр ласадики потала ордисиниң 22-июл тақилидиғанлиқини билдүргән икән, бундин башқа ласада учқучисиз айропилан вә ләгләкләрни учурушқа болмайдиғанлиқи һәққидә уқтурушлар чиқирилған икән.

7-Айниң 22-күни ласада кочиға чиқиш чәкләнгән вә завутлар тақалған, бирақ хитайдики таратқуларда ши җинпиңниң ласадики зиярити һәққидә техичә хәвәр тарқитилмиған. Әмма радийомизниң тибәт бөлүми ши җинпиңниң ласани зиярәт қилип, кишиләргә салам бәргәнликини җәзмләштүргән.

Мәлум болушичә, бу ши җинпиңниң 2013-йили хитай дөләт рәиси болғандин буян тунҗи қетим тибәтни зиярәт қилиши болуп һесаблинидикән. У 2011-йили муавин дөләт рәислик салаһийити билән тибәтни зиярәт қилған болуп, әйни чағда тибәт аптоном районлуқ парткомниң секритари дәл һазирқи уйғур аптоном районлуқ парткомниң секритари чен чүәнго иди.

Сүргүндики тибәт һөкүмитиниң баянатчиси тензин лекшей бу һәқтики баянатида ши җинпиңға чақириқ қилип: “ши җинпиң тибәт хәлқиниң һәқиқий арзусини аңлиши керәк, бу дегәнлик далай ламаниң тибәткә бериши вә тибәт мәсилисиниң һәқиқий һәл қилиниши демәктур,” дегән.