Гуаңҗу шәһәрлик 75-оттура мәктәптики 10 нәпәр уйғур оқуғучи тутуп кетилгән

Мухбиримиз қутлан
2016.06.20

Бу йиллиқ алий мәктәпкә кириш емтиһани ахирлишип аридин икки күн өткәндә, йәни 6-айниң 9-күни даириләр гуаңҗу шәһәрлик 75-оттура мәктәпниң “шинҗаң синипи” да оқуйдиған 10 нәпәр уйғур оқуғучисини тутқун қилғанлиқи мәлум.

Радийомизниң хитайчә бөлүми ениқлиған учурларға қариғанда, гуаңҗу сақчи даирилириниң бу қетимлиқ тутқунида 8 оғул, 2 қиз оқуғучи қолға елинған. Адвокат таң әпәндиниң гуаңҗу шәһәрлик биринчи тутуп туруш орнидин елип чиққан мәлуматиға қариғанда, тутқун қилинған 10 нәпәр уйғур оттура мәктәп оқуғучисиниң һәммиси “террор гумандарлири” сүпитидә тутуп турулмақтикән.

Игилинишичә, гуаңҗудики кишилик һоқуқни һимайә қилғучи зат таң шиңлиң бу йилниң бешида “дөләт һакимийитини ағдурушқа қутратқулуқ қилиш җинайити” билән әйиблинип, 5 йиллиқ муддәтлик қамақ җазасиға һөкүм қилинған. Униң адвокати ге юңши 6-айниң 9-күни гуаңҗу шәһәрлик биринчи тутуп туруш орниға берип, мәһбус таң шиңлиң билән көрүшкән. Таң әпәнди бу пурсәттә адвокат ге юңшиға әһвал мәлум қилип, өзи билән бир камерға қамалған камердишиниң абдулла исимлик уйғур оқуғучи икәнликини, униңдин гуаңҗу шәһәрлик 75-оттура мәктәптә оқуйдиған 10 нәпәр уйғур оқуғучиниң тутқун қилинғанлиқи һәққидики хәвәрни аңлиғанлиқини йәткүзгән. Буниң билән бу хәвәр дуняға ашкара болған.

Дуня уйғур қурултийиниң баянатчиси дилшат решит бу һәқтә инкас қайтуруп, гуаңҗу сақчи даирилири тутқун қилған 10 нәпәр уйғур оқуғучиниң тәқдиридин қаттиқ әндишә қиливатқанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.