Көзәткүчиләр: хитай рәһбәрлири «3-нөвәтлик шинҗаң хизмити йиғини» ға тәйярлиниватқан болуши мумкин

Мухбиримиз ирадә
2019-07-12
Елхәт
Пикир
Share
Принт

«Җәнубий хитай сәһири» гезитиниң хәвәр қилишичә, хитай һөкүмити йеңи бир нөвәтлик аталмиш «шинҗаң хизмити йиғини» ға тәйярлиқ қиливатқан болуши мумкин икән. Хәвәрдин қариғанда, йеқиндин буян шинхуа тори қатарлиқ бир қатар һөкүмәт мәтбуатлири һәдәп 2014-йили ечилған «2-нөвәтлик шинҗаң хизмити йиғини» ниң 5 йиллиқи һәққидә хәвәр тарқитишқа башлиған. Бу хәвәрләрдә бирдәк, 2-нөвәтлик шинҗаң хизмити йиғини ечилғандин кейинки бу 5 йил ичидә «көзлигән нәтиҗә һасил қилинди» дегән сөз көпләп ишлитилгән. Шинхуа өзиниң хәвиридә йәнә, «террорлуқ вә радикаллиққа қарши күрәштә ғәлибә қолға кәлтүрүлди, өткән 30 ай ичидә бирму террорлуқ вәқәси садир болмиди» дегән.

«Җәнубий хитай сәһири» гезитиниң мәркизи партийә мәктипидики оқутқучиларниң сөзини нәқил қилишичә, адәттә «мәлум муддәт ичидә зор нәтиҗә қолға кәлтүрүлди» дегән бу җүмлини хитай компартийә рәһбәрлири мәлум көзлигән мәқсәткә йәткән вә вәзийәткә қайта қарап чиқип, лазим болса бир қисим сиясәт өзгиришлирини елип баридиған чағда қоллинидикән. Хитайниң һөкүмәт ахбарат васитилири нөвәттә бу һәқтә көпләп тәшвиқат хәвәрлирини елан қилишини йеңи бир нөвәтлик «шинҗаң хизмити йиғини» үчүн асас һазирлаш, дәп қарашқа болидикән.

Хәвәрдин қариғанда, йеқиндин буян хитай мәркизи һөкүмитидин юқири дәриҗилик әмәлдарларниң вә уйғур елидики чен чүәнго башлиқ әмәлдарларниң тохтимай уйғур елидә хизмәт тәкшүрүшидә болмақтикән. Хитай компартийәсигә мәслиһәтчи болуп ишләватқан бир қисим тәтқиқатчиларму тохтимай уйғур елидә хизмәт зияритигә берип, хизмәт доклати тәйярлаватқан болуп, мана буларниң һәммиси хитай компартийәсиниң мушу йил яз ичидә «3-қетимлиқ шинҗаң хизмити йиғини» ачидиғанлиқиниң аламити, дәп қарашқа болидикән.

Пикирләр (0)
Share
Толуқ бәт