Хитайниң айфон ясайдиған фушикаң завути ишчилири исян көтүргән

Американиң иқтисад хәвәрлири қанили болған CNBC вә руйтрес агентлиқиниң хәвәр беришичә, хитайниң айфон қатарлиқ електр үскүнилири ясайдиған фушикаң (Foxconn) завутиниң нәччә йүз ишчиси һөкүмәтниң юқумни тизгинләш сиясити вә завутниң хараблашқан вәзийитигә наразилиқ билдүрүш һәрикити қозғиған.

Хәвәрдә көрситилишичә, җеңҗудики фушикаң завутиниң ишчиларға беридиған мукапат пулини арқиға сүргәнлики бу наразилиқ һәрикитиниң башлинишиға сәвәб болған. Хитайда кәм көрүлидиған бу һәрикәт мәзкур завутта йүз бәргән қамал сияситигә қарши наразилиқниң әвҗигә чиққан һалити дәп қаралмақтикән.

Бу ишчилар 23-ноябир күни әтигәндә фушикаң завутиниң алдиға келип “иш һәққимизни бәр” дәп шоар товлап наразилиқ билдүргән һәмдә завутниң алди дәрвазисидики камераларни чеқивәткән. Йәрлик һөкүмәт күчлири уларға яш аққузуш бомбиси атқан.

Җеңҗудики фушикаң завути әслидә 200 миң ишчини қобул қилған болуп, юқумни қамал қилиш сиясити кәлтүрүп чиқарған малиманчилиқта нәччә миңлиған ишчи завут қорусидин қечип кәткән. Завут уларни тутуп қелиш үчүн юқири мааш вә мукапат беришни вәдә қилған, әмма бәрмигән.

Җеңҗудики фушикаң дуня бойичә әң чоң айфон ишләпчиқириш завути болуп, дунядики 70 пирсәнт айфон бу завуттин чиқидикән. Нөвәттә бу завутниң ишләпчиқириши тохтап қалған болуп, бу айниң ахириғичә әмгәк күчи тепип ишләпчиқиришни әслигә кәлтүрүши мумкин әмәс икән.