Тик-токниң уйғур ирқий қирғинчилиқини тәнқид қилған мәшғулат директори вәзиписин истипа бәргән

Хитайниң хәлқарада даңлиқ видейо алақә суписи болған тик-токниң уйғур ирқий қирғинчилиқини тәнқид қилған баш мәшғулат дериктори ваннесса паппас вәзиписидин истипа бәргән. Ваннесса паппасниң туюқсиз истипа бериши, униң бу йил 3-айда уйғур ирқий қирғинчилиқини әйибләйдиғанлиқини билдүрүши билән бағлинишлиқ яки әмәслики техи ениқ әмәс. Баш иҗраийә дериктори җав шавзениң елан қилған баянатида, ваннесса паппасниң “игилик тикләш қизғинлиқиға қайта мәркәзлишиш үчүн истипа бәргәнлики” тәкитләнгән. Ваннесса паппас бу йил 3-айда тветтерда қилған бир сөзидә, хитайниң ‍уйғурларға йүргүзиватқан ирқий қирғнчилиқини әйибләйдиғанлиқини билдүрүп, бу қирғинчилиқни әйибләштин изчил өзини қачүрүп кәлгән җав шавзеға селиштурума болуп қалған.

Җав шавзе бу йил 3-айниң 23-күни америка авам палатасида гуваһлиқ бәргәндә, бир авам палата әзасиниң униңдин сориған хитайниң уйғурларға йүргүзиватқан ирқий қирғинчилиқини әйибләйдиған-әйиблимәйдиғанлиқи һәққидики суалиға җавап бериштин өзини қачурған. Әмма ваннесса паппас твиттерда бу һәқтики соалға қирғинчилиқни әйибләйдиғанлиқини ейтқан. Америка NBC хәвәрлириниң мәлум қилишичә, тик-ток ваннесса паппасниң орниға дисней ширкитиниң сабиқ ‍ахбарат баянатчиси зения муча тәйинләнгән.

Лекин ваннесса паппас тик-тикниң хизмәтчилиригә қалдурған сөзидә “тик-токта қолға кәлтүрүлгән барлиқ мувәппәқийәтләрни көздә тутуп, ахири игилик тикләш қизғинлиқимни илгири сүрүш вә қайта ойлинишниң мувапиқ пәйти кәлгәнликини һес қилдим” дегән. Бу йил 23-март күни америка авам палатасида өткүзүлгән 5 саәтлик гуваһлиқ йиғинида, җав шавзе палата әзалирини қайил қилалмиған, палата әзалири тик-токни чәкләшни тәләп қилған. Һәтта америка кеңәш палата әзаси марку рубийо йеқинда җав шавзениң шу қетимлиқ йиғинда палата әзалириға “ялған мәлумат” бәргәнлики, америка әдлийә министирлиқиниң җавшавзе үстидин дело турғузуп тәкшүрүшини тәләп қилған.