Xitay ijtima'iy alaqe wasitiliridiki "Chembirek" kontrol qilishni yene kücheytti

Muxbirimiz erkin
2017-09-08
Share

Xitay döletlik tor uchur ishxanisi 7‏-séntebir yéngi belgilime chiqirip, ijtima'iy alaqe wasitilirining "Dostlar chembiriki", blog we topliridiki uchur, munazirilerni kontrol qilishni dawamliq kücheytti.

Roytérs agéntliqining xewiride qeyt qilishiche, bu belgilime xitay kompartiyesining bu yil 11‏-ayda chaqirilidighan 19-qurultiyi bilen munasiwetlik bolup, uning meqsiti "Dostlar chembiriki" we "Ijtima'iy toplar" diki nazuk témilargha a'it uchur, munazirilerni kontrol qilishken.

Belgilimide, tor mulazimiti qilidighan shirketler xéridarlirining heqiqiy kimliki bilen torgha kirishini nazaret qilish, blog, "Dostlar chembiriki", "Ijtima'iy top" tiki dostlarning öz ara yollighan uchur we kündilik alaqe xatirisini az dégende 6 ay saqlishi telep qilin'ghan.

Uningda yene, tor mulazimet shirketlirining krédit sistémisini yolgha qoyup, tor qollan'ghuchilargha ularning krédit karta nomurigha qarap mulazimet qilish, qa'idige xilapliq qilghan toplarning nomurini tartish, krédit nomuri töwenlerge mulazimet qilishni toxtitish we alaqidar hökümet organlirigha melum qilish telep qilin'ghan.

Xitay döletlik tor uchur ishxanisining uqturushida körsitishiche, mezkur belgilime bu yil 8‏-öktebirdin bashlap resmiy ijra qilinishqa bashlaydiken.

Lékin bezi közetküchilerning ilgiri sürüshiche, bu belgilime Uyghur rayonida xéli burun ijra qilinip, ündidar, QQ, tyéba, alipay qatarliq ijtima'iy alaqe wasitiler qattiq kontrol qilin'ghan. Nurghun Uyghurlar ündidar, QQ qatarliqlargha uchur yollap yaki uchur tapshuruwélip qolgha élinip ketken.

Közetküchiler, Uyghur rayonida yolgha qoyulghan bezi tedbirler bu qétim xitayning pütün memliket miqyasigha kéngeytilgenlikini bildürdi.

Yéngi belgilimide yene, dostlar chembiriki, ijtima'iy toplarni kim qurghan bolsa, bashqurushqa shuning mes'ul bolidighanliqi eskertilip,"Topning igisi kim bolsa yaki topni kim bashqursa shu mes'ul bolushi kérek" déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet