Тйәнҗин портида йәнә партлаш йүз бәрди

Мухбиримиз меһрибан
2015-10-13
Share

Хитайниң шинхуа агентлиқи 12-өктәбир дүшәнбә күни йерим кечидә тйәнҗин портида партлаш йүз бәргәнлики, әмма өлүш-ярилиниш әһвали көрүлмигәнликини хәвәр қилди.

Бу йил 12-авғуст күни дәл мушу портта 165 адәмниң өлүши 700 дин артуқ адәмниң ярилинишға сәвәб болған химийилик буюмлар искилатидики партлаш вәқәси йүз бәргән болуп, техи икки һәптә илгирила хитай даирилири порттики бихәтәрлик тәкшүрүшиниң тамамланғанлиқини елан қилған иди.

Дәл икки ай болған кечиси, йәнә әйни портта охшаш партлашниң йүз бериши диққәт қозғиди. Хитай һөкүмәт хәвәрлиридә бу қетимқи партлаш һәққидә тәпсилий хәвәрләр берилмигән болсиму, әмма иҗтимаий таратқулардики сүрәтлик хәвәрләрдә кечидики партлашниң бирқанчә қетим тәкрарланғанлиқи вә партлаштин кейин от шарчилири вә ялқуниниң асманға көтүрүлгәнлики тилға елинди.

Радиомиз сәйшәнбә күни тйәнҗингә телефон қилип әһвал игилигинидә, һөкүмәт хадимлири вәқә һәққидә тәпсилий мәлумат беришни рәт қилди. Шәһәр аһалиси болса һөкүмәткә наразилиқини ипадилиди.

Ваң фамилилик бир аял "һөкүмәт вәқәдә ярилиниш әһвали болмиди дәп хәвәр бәрди. Әмма бу йәрдә хәвәрләр қамал қилиниватиду. Биз пуқралар партлашниң сәвәби вә қандақ буюмларниң партлиғанлиқидин хәвәрсиз. От шарчилири өткән қетимдикигә охшап туриду. Әгәр йәнила зәһәрлик химийилик партлиғучи буюмлар амбирида партлаш йүз бәргән болса, партлаштин кейинки муһит булғиниши техиму еғир болиду. Биз һөкүмәттин бундақ хәтәрлик буюмлар завути вә искилатлирини аһалиләр районидин йирақ тутушни үзлүксиз тәләп қилип келиватимиз, әмма улар авазимизға қулақ салмиди" деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт