Уйғур аптоном райони даирилири учур-алақә васитилиригә қаритилған назарәтни күчәйтмәктә

Мухбиримиз ирадә
2016-01-07
Share

Уйғур аптоном райони даирилириниң түрлүк низамлар арқилиқ учур-алақә васитилиригә қаритилған назарәтни күчәйтиватқанлиқи мәлум болмақта.

Тәңритағ ториниң хәвиридин мәлум болушичә, үндидардики “биваситә аңлитиш қатнаш қизиқ линийиси” намлиқ хәвәр суписи 5-январ күни үрүмчидә еғир қатнаш вәқәси йүз берип 22 киши қаза қилди, дәп хәвәр тарқатқанлиқи үчүн тор башқуруш даирилири тәрипидин “ялған хәвәр тарқатти” дәп тақиветилгән.

Хәвәрдә ейтилишичә, юқиридики бу үндидар суписи интернетниң йәттә түрлүк бәлгилимисигә вә дөләтлик алақә тори учурлири ишханиси оттуриға чиқарған “пәйтлик алақә қорали аммиви учурлири мулазимитини тәрәққий қилдуруш вә башқуруш вақитлиқ бәлгилимиси” дики маддиларға хилаплиқ қилған икән.

Юқирида тилға елинған “пәйтлик алақә қораллири” ни башқурушқа даир бәлгилимидә “аммиви учур мулазимәт паалийити билән шуғулланғучилар алди билән башқуруш тармақлириға әнгә алдуруш, һәқиқий исми билән һесаб ечиш, рәсмий ахбарат органлири тәрипидин тарқитилмиған сиясий хәвәрләрни елан қилмаслиқ, көчүрүп тарқатмаслиқ, қанун-қаидигә риайә қилиш, әксичә иш қилғанлар қанун бойичә җазалиниш” дегәнгә охшаш маддилар йәр алған.

Хитай һөкүмити йеқинқи йиллардин буян интернеттики мәзмунларни башқурушқа алақидар нурғун бәлгилимиләрни елан қилип, контролни күчәйтти. Даириләр буниң “җәмийәт тәртипини сақлаш” үчүн зөрүрлүкини илгири сүриду. Бирақ хәлқара кишилик һоқуқ органлири хитай һөкүмитиниң бу арқилиқ пикир әркинлики вә пуқраларниң учурға еришиш әркинликини қамал қиливатқанлиқини тәнқид қилип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт